गायिका विष्णु माझीलाई श्रीमानले किन बन्धक बनाए ?

लोक गायिका विष्णु माझीलाई उनका श्रीमानले बन्धक बनाएको प्रसंग केही दिनयता सञ्चारमाध्यममा लगातार समाचारको रुपमा आइरहेका छन् । यता गायिका माझीका बाबुले समेत छोरीलाई बन्धक बनाएको र भेट नभएको वर्षौ भइसक्यो भन्ने सार्वजनिक भए पछि माझी सबैको चासोमा परेकी थिइन् ।

निरन्तर राष्ट्रिय दैनिक देखि अनलाइन मिडियाहरुमा यो समाचार आउने थालेपछि प्रकरण प्रहरी कार्यालयसम्म पुगेको छ । श्रीमान सुन्दरमणि अधिकारीले गायिका माझीलाई बन्धक बनाएको आरोप सर्वत्र फैलिए पछि छानविनका लागि स्याङ्जा प्रहरी कार्यालयले बोलाएको छ । अधिकारी विष्णु माझीलाई लिएर प्रहरी कार्यालय पुगेका थिए ।

प्रहरी कार्यालयमा गायिका माझीका माइती पक्षका आफन्त पनि उपस्थित थिए । माझी सार्वजनिक रुपमा नदेखिएको, आफन्तसँग पनि भेट निकै पातलो हुने गरेको बाहिर आएपछि प्रहरीले अधिकारीलाई यसबारे बुझ्न बोलाएको बुझिएको छ । गायिका माझीका श्रीमान सुन्दरमणिले उनी अनपढ, सोझी र निकै कम बोल्ने स्वभावका कारण आफुले एक्लै हिँड्न र विदेशमा समेत एक्लै जान नदिएको दावी गरे ।

मुखमा मास्क लगाएर जिल्ला प्रहरी कार्यालयभित्र छिरेकी माझीले श्रीमानसँग कुनै समस्या नभएको बताएकी छिन् । मास्क लगाएर बोल्न थालेपछि प्रहरीले उनलाई मास्क खोलेर कुरा गर्न आग्रह गरेको थियो ।

माझी विगत एक दशकयता चर्चित लोकगायिकाको रुपमा स्थापित छिन् । हालै उनले गाएको गाएको ‘सालको पात टपरी हुनी’ बोलको गीत निकै चर्चामा छ । २ करोड भन्दा बढि यो गीत युट्युवमा हेरि सकिएको छ ।