चुडामणि शर्मा लाई थुनामा राख्न नपाईने कानुनविद्को तर्क : बहस कि व्यापार ?

३१, काठमाण्डौ । ठूला व्यापारिक फर्मलाई अर्बौं रुपैयाँ कर छुट दिएर आर्थिक अनियमितता गरेको आरोपमा अख्तियारको थुनामा रहेका आन्तरिक राजस्व विभागका महानिर्देशक चूडामणि शर्मालाई अख्तियारले अधिकारक्षेत्रभन्दा बाहिर गएर थुनेको जिकिर वरिष्ठ कानुनविद्हरूको छ । आजको अन्नपूर्ण पोस्टमा खबर छ ।
यद्यपी कतिपयले भने शर्माको पक्षमा बहस गर्न अघिसरेपछि जस्तोसुकै तर्क गरेर भएपनि वकिल वा कानुनविद्ले शर्मालाई छुटाउने प्रयास गरेको टिप्पणी गरेका छन् । वरिष्ठ कानुनविद्ले भनेकै भए पनि त्यो व्यवसायिक पाटो भएको र शर्माको पक्षमा वकालत गर्नु वकिल पेशाभित्रको बाध्यता भएको समेत तर्क गरिएको छ ।
उनीविरुद्ध विशेष अदालतमा शुक्रबार अख्तियारले दायर गर्ने भनिएको भ्रष्टाचारमुद्दा सबै फाइल रुजु गर्न नभ्याइएका कारण दर्ता हुन नसके पनि उनको पक्षमा उनकी पत्नी कल्पना उप्रेतीले              सर्वोच्च अदालतमा दर्ता गरेको बन्दीप्रत्यक्षीकरण रिटमा भने बहस भएको थियो ।
बहस गर्ने क्रममा शर्माका कानुन व्यवसायीले कर फस्र्योट ऐनअनुसार अख्तियारले यसमा छानबिन गर्न नपाउने र अनुसन्धान नै नहुने विषयमा थुनामा राख्न नमिल्ने भन्दै रिहाइको मागसमेत गरेका छन् । सर्वोच्चका न्यायाधीश चोलेन्द्रशमशेर राणा र प्रकाशमानसिंह राउतको संयुक्त इजलासमा शर्माको रिटमा सुनुवाइ भएको थियो ।