न्यायाधीश जोशीको त्यान्द्रे आशा मेटियो

काठमाडौं । संवैधानिक परिषदको वैठकले प्रधानन्यायाधीशमा चोलेन्द्र समशेर जबराको नाम सिफारिस गरेको छ । सर्वोच्च अदालतका लागि प्रधानन्यायाधीशमा जबराको नाम सिफारिस गरेसँगै अर्का न्यायाधीश दीपकराज जोशीको त्यान्द्रे आशा मेटिएको छ ।

प्रधानमन्त्री केपी शर्मा ओलीको अध्यक्षतामा बसेको संवैधानिक परिषदको वैठकले चोलेन्द्रको नाम सिफारिस गरेको हो ।

जोशी प्रधानन्यायाधीश बन्नका लागि नेताहरुकोमा धाइरहेका थिए । उनका आसेपासे पनि प्रधानन्यायाधीश बन्ने ढुक्कका साथ उनलाई ढाडस दिंदै दौडधुप गरिरहेका थिए । विपक्षी दलका नेता कांग्रेस सभापति शेरबहादुर देउवाले जोशीलाई प्रधानन्यायाधीशमा सिफारिस गर्न जोड दिएका थिए । देउवाले जोशीलाई प्रधानन्यायाधीश बनाउने अडानमा २ पटकसम्म संवैधानिक परिषदको वैठक स्थगित गरेका थिए ।

समय लम्बाएर जोशीलाई कामु प्रधानन्यायाधीशसम्म पनि दिनुपर्ने देउवाले प्रस्ताव राखेको संवैधानिक परिषदका एक सदस्यले बताए । तर, एकपटक संसदीय सुनुवाईबाट अस्विकृत भैसकेका जोशीलाई प्रधानन्यायाधीशमा दोस्रोपटक सिफारिस गर्नु पनि संवैधानिक परिषद्का लागि निकै चुनौतिपूर्ण थियो ।

त्यसैकारण चोलेन्द्रशसमशेर जबरालाई प्रधानन्यायाधीशका लागि सिफारिस गरेको हो । न्याय परिषद् सचिवालयले भने दीपकराज जोशी र जबरा दुवैको नाम पठाएको थियो । बिहिबारदेखि न्यायाधीश जोशीको प्रधानन्यायाधीश बन्न पाउने त्यान्द्रे आशा मेटिएको छ ।

सर्वोच्चका प्रधान न्यायाधीश ओमप्रकाश मिश्रको पुस १७ गते उमेर हदका कारण कार्यकाल सकिंदैछ ।