यातायात व्यवसायी कम्पनीमा जाने म्याद फागुनसम्म

यातायात व्यवसायीहरु कम्पनीमा जाने म्याद फेरि थपिएको छ । वैशाखमा नै सिण्डिकेट अन्त्यको घोषणा गरेको सरकारले यातायात व्यवसायीहरु कम्पनीमा दर्ता गर्ने म्याद फागुन मसान्तसम्म थप गरेको हो । पौष १ गतेदेखि कम्पनीमा जानुपर्ने बताएको सरकारले यातायात व्यवसायीको आग्रहपछि म्याद थप गरेको हो ।

हिजो गृहमन्त्री रामबहादुर थापा बादलको अध्यक्षतामा बसेको संयुक्त बैठकले यातायात कम्पनीलाई प्राइभेटमा लैजाँदा असीमित सेयर सदस्य राख्न पाउनुपर्ने मागलाई सम्बोधन गर्ने निर्णय गरेको छ । यातायात विभागका महानिर्देशक लावन्य ढकालले अन्तिम पटकका लागि समितिको म्याद थप गर्ने निर्णय भएको बताउनुभयो । उहाँका अनुसार अब व्यवसायीको माग सम्बोधन लागि ‘कम्पनी ऐन’ संशोधन गरिनेछ ।

सरकारको यो निर्णयसँगै यातायात समितिको सम्पत्ति राष्ट्रियकरण गर्ने सम्भावना पनि टरेको छ । यसअघि यातायात समितिहरुलाई कम्पनीमा जाने म्याद मंसिर मसान्तसम्म दिइएको थियो । तर, यो अवधिमा झण्डै ४ लाख मध्ये ९ हजार मात्रै सवारी कम्पनी मातहत आएका छन् भने ६ हजार यातायात विभागमा पञ्जीकृत भएका छन् ।