राष्ट्रवादी विचारधारा बोकेका पार्टीहरु एक हुनुको बिकल्प छैनः कमल थापा

काठमाडौं, १६ पुस । राष्ट्रिय प्रजातन्त्र पार्टीका अध्यक्ष कमल थापाले आफ्नो पार्टीले हिन्दु जागरण अभियान सुरु गर्न लागेको जानकारी दिए । उनले धर्म निरपेक्षताको नाममा सरकारले नै अनावश्यक गतिविधि सुरु गर्न थालेकाले आफुहरुले हिन्दु जागरण अभियान सुरु गर्न लागेको बताए ।

थापाले राष्ट्रवादी विचारधारा बोकेका पार्टीहरु एक हुनुको बिकल्प नभएको बताए । उनले एउटै एजेण्डा बोकेका दल बिभिन्न खेमामा विभाजन हुँदा त्यसको फाईदा अर्को पक्षले उठाएको भन्दै अध्यक्ष थापाले विभाजित दलहरुले सोच्ने बेला आएको उल्लेख गरे ।

राष्ट्रिय पहिचान खतरामा पर्दै गएकाले त्यसको खबरदारीका लागि सबै सचेत हुनुपर्ने थापाको भनाई थियो । ढिलै भएपनि प्रमुख प्रतिपक्ष नेपाली कांग्रेसले त्यसको अनुभूति गर्दै हिन्दु राष्ट्रको बहस सुरु गरेको घटना त्यसैको उपज भएको थापाको दावी छ ।