घरको छतबाट खसेर रवि लामिछानेका निजी चालक घाइते

काठमाडौं । राष्ट्रिय स्वतन्त्र पार्टीका सभापति रवि लामिछानेको घरको छतबाट खसेर उनका गाडी चालक घाइते भएका छन् ।

आज सोमबार विहान ४ बजेतिर भरतपुर–११ स्थित लामिछानेकै घरको छतबाट लडेर उनका निजी चालक गम्भीर घाइते भएका हुन् ।

घाइते चालक सिन्धुपाल्चोक बाह्रबिसे नगरपालिका–३ घर भएका ३९ वर्षीय शम्भु भनिने दिलबहादुर थापा रहेका छन् ।जिल्ला प्रहरी कार्यालय चितवनका अनुसार उनको खुट्टा र टाउकोमा चोट लागेको छ ।

प्रहरीका अनुसार तनहुँमा चुनावी प्रचारप्रसार सकेर लामीछानेसहितको टोली आइतबार बेलुका चितवन आइपुगेका थिए। लामिछाने सो घरको भुईँ तलामा सुतेका थिए। दोस्रो तलामा दीपक बोहोरा लगायत सुतेका थिए ।

तेस्रो तलामा पार्टीका प्रवक्ता मुकुल ढकाल, उनका सवारी चालक र लामिछानेका सवारी चालक दिलबहादुर सुतेका थिए। दिलबहादुर बिहान छतबाट खसेको अवस्थामा भेटिएको स्रोतले जनाएको छ ।

गम्भीर घाइते भएका दिलबहादुरको पुरानो मेडिकल कलेज भरतपुरमा उपचार भइरहेको छ। घटनाको विषयमा अनुसन्धान भइरहेको प्रहरीले जनाएको छ ।