आइप्याडमा हेरे प्रधानमन्त्री ओलीले १३ औँ सागको उद्घाटन

आइतबार साँझ दशरथ रंगशालामा भव्य रुपमा उद्घाटन भएको १३ औं दक्षिण एसियाली खेलकुदको उद्घाटन समारोहको लाइभ प्रधानमन्त्री ओलीले आइप्याडमा हेरेका छन् । प्रधानमन्त्री ओलीले खेलाडीहरुलाई निकै मन पराउने भएकाले अस्वस्थ हुँदाहुँदै पनि आइप्याडबाटै समारोहको उद्घाटनको प्रत्यक्ष प्रशारण हेरेको प्रेस सल्लाहकार सुर्य थापाले बताए ।

प्रधानमन्त्री ओली आफै सागको उद्घाटन समारोहमा उपस्थित भई सम्बोधन गर्ने कार्यक्रम उनको स्वास्थ्यको कारण अवरुद्द भएको थियो । उनले नेपाली खेलाडीहरुलाई विशेष सम्बोधन गर्ने कार्यक्रम पनि रहेको थियो । उक्त कार्यक्रम पनि ओलीको स्वास्थ्यको कारण अर्थमन्त्री डा. युवराज खतिवडाले सम्बोधन गरेका थिए ।

गत मंगलबाट एपेन्डिसाइटिसको शल्यक्रियापछि प्रधानमन्त्री ओली मनमोहन कोर्डियोथोरासिक भास्कुलर तथा ट्रान्सप्लान्ट सेन्टरको सघन उपचार कक्षमा उपचाररत छन् । प्रधानमन्त्रीका प्रेस सल्लाहकार थापाले ओलीको स्वास्थ्यमा अपेक्षित गतिमा सुधार भइरहेको र आइसीयुमै सामान्य हिँडडुल गर्न थालेको बताए।

प्रधानमन्त्री ओलीको उपचार टोलीका संयोजक डा. अरुण सायमीले ठोस आहार खुवाउन सुरु गरिएको बताए। गत मंगलबार प्रधानमन्त्री ओलीको एपेन्डिसाईटिसको शल्यक्रिया गरिएको थियो। एपेन्डिसाइटिससहित पेटको संक्रमण पेरिटोनाइटिस देखिएपछि प्रधानमन्त्रीलाई सघन उपचार कक्षमा राखेर एक साता उपचार गर्नुपर्ने चिकित्सकले बताएका छन्।