टेलिकमको सेयर आम्दानीमा वृद्धि , ल्याण्ड लाईन सेवा हटाईने

काठमाडौं । नेपाल टेलिकमले गत आर्थिक वर्षको  चौथो त्रैमासिक वित्तीय विवरणपश्चात् गत आर्थिक वर्षमा कम्पनीको कुल आय करिब रु ४५ अरब ५६ करोड ५८ लाख रहेको बताएको छ । अघिल्लो आर्थिक वर्षको तुलनामा सो आय २.१९ प्रतिशतले वृद्धि भएको हो ।

साथै सोही अवधिमा कम्पनीको नाफा करिब १५ अरब ६६ करोड ७५ लाख रहेको छ । यसअनुरुप अघिल्लो आर्थिक वर्षको तुलनामा कम्पनीको मुनाफा १।९२ प्रतिशतले वृद्धि भएको छ । जसले गर्दा कम्पनीको प्रतिशेयर आम्दानीमा अघिल्लो आर्थिक वर्षको तुलनामा रु १.९६ ले बृद्धि भई प्रति शेयर आम्दानी रु १०४.४५ पुगेको छ ।

केही वर्ष अघि देखि शुरु भएको कम्पनीको एक महत्वाकांक्षी आयोजना मध्येको एकीकृत विलिङ प्रणालीमा ल्यान्डलाइन सेवासमेत रुपान्तरित भएपश्चात् गत आर्थिक वर्षमा नै सो आयोजना सम्पन्न भएको टेलिकमले जनाएको छ ।

यस्तैगरी विगत लामो समयदेखि सञ्चालनमा रहेका ल्यान्डलाइन सेवाका पुराना उपकरणहरु विस्थापन गरी टेलिकमले टि डी एम माइग्रेसन आयोजना अन्तर्गत आधुनिक प्रविधिमा आधारित आइएमएस उपकरणमार्फत सेवा प्रदान गर्न आरम्भ गरेको छ ।

सो अनुरुप हालसम्म करिव एक लाख ९० हजार लाइन नयाँ प्रविधिमा रुपान्तरित भई सेवा सञ्चालनमा आइसकेको छ । क्रमिक रुपमा अन्य लाइनहरु पनि रुपान्तरण गर्ने कार्य जारी रहेको टेलिकमले बताएको छ ।