बुटवलमा कांग्रेस र माओवादी केन्द्र चुनावी तालमेलःकांग्रेस मेयरमा,उपमेयरमा माओवादी
सारांश
- बुटवल ।
- बुटवल उपमहानगरपालिकामा कांग्रेस र माओवादी केन्द्रबीच मुख्य पदमा चुनावी तालमेल भएको छ ।
- कांग्रेसले मेयर र माओवादीले उपमेयरमा उम्मेदवारी दिने भएका छन् ।
बुटवल । बुटवल उपमहानगरपालिकामा कांग्रेस र माओवादी केन्द्रबीच मुख्य पदमा चुनावी तालमेल भएको छ । कांग्रेसले मेयर र माओवादीले उपमेयरमा उम्मेदवारी दिने भएका छन् ।
माओवादी केन्द्रीय कार्यालय सदस्य डिलाराम आचार्यका अनुसार मेयर कांग्रेसलाई र उपमेयर माओवादी केन्द्रलाई दिने गरी तालमेलको सहमति भएको हो । मेयरमा कांग्रेसका खेलराज पाण्डे र उपमेयरमा माओवादीका जगत पोखरेलले गठबन्धनका तर्फबाट उम्मेदवारी दिने भएका छन् ।
माओवादी नेता आचार्यका अनुसार रूपन्देहीको देवदह नगरपालिकामा पनि कांग्रेस र माओवादीवीच प्रमुख पदमा तालमेल हुने भएको छ । यहाँ पनि मेयरमा कांग्रेसले र उपमेयरमा माओवादीले उम्मेदवारी दिनेछन् । मेयरमा हिराबहादुर खत्री र उपमेयरमा टीका न्यौपाने गौतमलाई उम्मेदवार बनाउने कांग्रेस र माओवादीले जारी गरेको संयुक्त विज्ञप्तिमा उल्लेख छ ।
कांग्रेस रूपन्देहीका सभापति अब्दुल रज्जाक र माओवादी जिल्ला इन्चार्ज हकिकुल्ला खाँद्वारा हस्ताक्षरित विज्ञप्तिमा दुवै स्थानका गठबन्धन उम्मेदवारलाई विजयी गराउन दुवै पार्टीका नेता तथा कार्यकर्ता, समर्थक, शुभेच्छुक तथा मतदातामा अपिल गरिएको छ । दुवै नगरपालिकाको वडा तहमा तालमेल गर्न स्थानीय पार्टी कमिटीलाई जिम्मा दिएको नेता आचार्यले बताए ।
त्यस्तै रूपन्देहीका अन्य स्थानीय निकायमा तालमेलका लागि छलफल जारी रहेको छ ।
प्रतिक्रिया