थाई दूतावासमा ठगी गरेर फरार भएका दुई महिला पक्राउ

६ असार,काठमाडौं । काठमाडौंस्थित थाई दूतावासमा ठगी गरेर फरार भएका दुई महिला पक्राउ परेका छन् । बानेश्वरकी ४० वर्षीया सुचित्रा शर्मा गौतम र बबरमहलकी ४४ वर्षीया शोभना श्रेष्ठ प्रजापतिलाई केन्द्रीय अनुसन्धान ब्युरो (सिआइबी) ले पक्राउ गरेको हो ।

थाई दूतावासको भिसा शाखामा कार्यरत रहँदा उनीहरूले ८२ लाख ५५ हजार रुपैयाँ हिनामिना गरेको भन्दै दूतावासले अदालतमा मुद्दा हालेकोे थियो । १९ अगस्ट २००३ देखि १३ नोभेम्बर २००४ सम्म उनीहरूले दूतावासको भिसाबापतको राजस्व हिनामिना गरेका थिए । पक्राउ नपरेकाले त्यतिवेला उनीहरूको मुद्दा अदालतमा मुल्तबीमा राखिएको थियो ।

१ असारमा सिआइबीले उनीहरूलाई पक्राउ गरी अदालतमा पेस गरेकामा आइतबार काठमाडौं जिल्ला अदालतले चार / चार लाख रुपैयाँ धरौटीमा छाड्ने आदेश भएको सिआइबीकी एसपी मीरा चौधरीले बताइन् । उनीहरूले भिसाबापत सर्वसाधारणबाट लिएको रकम आफैँ राखी जागिर छाडेर फरार भएका थिए ।