सुरु नभई सकिएको प्रेमध्वजको अनौठो प्रेम कहानी

गायक प्रेमध्वज प्रधानसँग सम्बन्धित थुप्रै रमाइला किस्साहरु जोडिएका छन् । उनी तन्नेरी उमेरका निकै ह्याण्डसम थिए । उनी यत्ति ह्याण्डसम थिए कि, त्यतिबेलाकी चर्चित भारतीय हिरोइन माला सिन्हा समेत उनको रुप देखेर भुतुक्कै भएकी थिइन् । प्रेमध्वजले फिल्म माइतीघरमा गीत गाएका कारण पनि उनको हिमचिम माला सिन्हासम्म पुग्यो । प्रधानको रुप त सुन्दर छँदै थियो, स्वर पनि उस्तै सुमधुर भएका कारण माला सिन्हा सुटिङका क्रममा उनी नेपाल रहुन्जेल सिन्हाको रोजाईमा प्रधान परे । फिल्मको गीत रेकर्ड गरिसके पछि सामान्यतया गायक गायिकाको काम सकिन्छ । तर प्रेमध्वजले भने सुटिङ युनिटसँगै विभिन्न स्थान पुग्नु पर्यो, माला सिन्हाको विशेष आग्रहमा । यसरी सुटिङ टिमसँग हिड्दा प्रधान मालालाई गीत सुनाएर मोहित पार्थे । प्रधान चर्चित भारतीय गीतहरु निकै मीठोसँग गाउने भएकाले पनि उनले गीत सुनाएर मालालाई सुटिङको थकान हटाउन निकै सहयोग गरे ।

भनिन्छ मालाले सिपी लोहनी होइन, प्रेमध्वजलाई मन पराउथिन् । तर प्रेम विवाह गरेर वियोगको सामना गरेकी प्रेमध्वजकी आमाले भाँजो हालेका कारण प्रेमध्वज र माला सिन्हा प्रेम सम्बन्धमा पुग्न नपाएको अनुमान त्यतिबेलाका उनीहरुका समकालिनको अनुभव छ । प्रेमविवाह गरे पनि वियोगको सामना गर्नु परेका कारण प्रेमध्वजकी आमालाई माया, प्रेम जस्ता कुरामा रत्तिभर विश्वास थिएन ।

माइतीघर फिल्मको सुटिङका क्रममा नेपाल आएकी अभिनेत्री माला सिन्हा उनको रुप र स्वरबाट निकै प्रभावित भएकी थिइन् । माला सिन्हाको झुकाव उनी प्रति कतिसम्म थियो भने फिल्मको सुटिङ युनिट जहाँ जहाँ पुग्थ्यो सिन्हाको अनुरोधमा निर्माण पक्षले प्रेमध्वजलाई पनि सँगै लग्नु पथ्र्यो । माला सिन्हाकै अनुरोधमा प्रेमध्वज भारतको मुम्बई पनि पुगेका थिए । उनले त्यहाँ करिब ८ महिना बिताए । त्यो समय सिन्हाले उनलाई भारतका चर्चित संगीतकार खयाम, जयदेव लगायतलाई पनि भेटाएकी थिइन् । प्रेमध्वजलाई भारतीय संगीतकारले हिन्दी फिल्ममा गीत गाउने आश्वासन समेत दिएका थिए । तर आमा बिरामी भएको खबर पाए लगत्तै उनी नेपाल फर्किनु परे पछि उनको हिन्दी फिल्ममा गीत गाउने सपना अधुरै रह्यो नै माला सिन्हासँगको दुरी पनि कहिल्यै नभेटिने गरि बढेर गयो ।