सन्दीपले विकेट लिएर होइन यसरी जिताए टिमलाई

बकाठमाडौं । नेपाली राष्ट्रिय टिमका क्रिकेटर सन्दीप लामिछाने बंगलादेशमा जारी बंगलादेश प्रीमियर लीग (बीपीएल) खेलिरहेका छन् । उनको टीम सिल्हेट सिक्सरले आफ्नो दोस्रो खेलमा पहिलो जित दर्ता गर्दा नेपाली स्टार सन्दीपले विकेट लिएर होइन रन आउट गरेर टीमको जितमा महत्वपूर्ण भूमिका निर्भाह गरेका छन् ।

सिक्सर र चित्तोगंग भाइकिंग्सबीच भएको खेलमा सन्दीपको टिमका कप्तान डेबिड वार्नरले टस जितेर पहिला ब्याटिंग गर्ने निर्णय लिएका थिए । टस जितेर पहिला ब्याटिंग गरेको सिक्सरले पावर प्लेमा महत्वपूर्ण ३ विकेट ७ रनको स्कोरमा गुमाएको थियो । त्यसपछि ब्याटिंग गर्न आएका युवा बंगाली ब्याट्सम्यान अफिफ हुसेनले विस्फोटक ब्याटिंग गरे । उनले २८ बलमा ४५ रन बनाए भने टिकेर खेलेका कप्तान डेबिड वार्नरले ४७ बलमा ५९ रन बनाए । अन्तिमतिर ब्याटिंग गरेका वेष्टइण्डिजका विस्फोटक ब्याट्सम्यान निकोलश पुरनले विस्फोटक ब्याटिंग गर्दै ३२ बलमा ५२ रनको योगदान दिँदै टिमको स्कोर १६८ पुर्याए ।

१६९ रनको लक्ष्य पछ्याएको भाइकिंग्सले पहिलो ओभरमा विस्फोटक अफगानी ब्याट्सम्यान अहमद शेहजादलाई गुमाए पनि अर्का ओपनर क्यामरुन डिलपोर्टले विस्फोटक ब्याटिंग गर्दै २२ बलमा ३८ रन बनाए । भाइकिंग्सले सजिलै लक्ष्य भेटाउने सम्भावना देखिएको बेला मैदानमा नेपालका सन्दीपले कमाल देखाएर विस्फोटक ब्याटिंग गरिरहेका डिलपोर्टलाई उनले डिपबाट डाइरेक्ट हिटमा रनआउट गराउँदै मैदान बाहिर पठाएपछि खेलले नयाँ मोड लियो ।

भाइकिंग्सका लागि अन्तिम ओभरमा जितका लागि २४ रन चाहिएको अवस्थामा रुबी फ्र्याकिंगले दुई छक्का प्रहार गरेपछि टिमलाई जित नजिक पुर्याएका थिए । तर, सिक्सले ५ रन ले सिजनमा पहिलो जित दर्ता गरायो ।

नेपालका सन्दीपले रनआउट र एक क्याच पनि लिएर टिमको जितमा महत्वपूर्ण भूमिका निभए भने आफ्नो ४ ओभरमा निकै इकोनोमिकल बलिंग गर्दै २१ रनमात्र दिए । उनले चार ओभरमा एउटामात्र बाउण्ड्रीका रुपमा चौका खाएका थिए । त्यो पनि चौथो ओभरको अन्तिम बलमा । जितसँगै सिक्सर अंकतालिकाको चौथो स्थानमा उक्लिएको छ ।