९० प्रतिशत केन्द्रमा मतदान राम्रो : इयु

काठमाडौं,मंसिर २३ – युरोपियन युनियनको निर्वाचन पर्यवेक्षणले ९० प्रतिशत मतदान केन्द्रमा मतदान राम्रो भएको देखाएको छ । इयुको निर्वाचन पर्यवेक्षण मिसनले ११ प्रतिशत मतदान केन्द्रमा भने मतदान कार्य नराम्रो वा धेरै नराम्रो रहेको मूल्यांकन गरेको छ ।

कञ्चनपुरमा इयुलाई पर्यवेक्षण गर्न दिइएको थिएन । त्यसलै मिसनले ११ प्रतिशत मतदान केन्द्रमा मतदानको काम धेरै नराम्रो भएको उल्लेख गरेको हो ।

यस्तै चुनावले भेला हुने र अभिव्यक्तिको स्वतन्त्रता जस्ता राजनीतिक स्वतन्त्रताहरू चुनाव प्रचारप्रसारका क्रममा भएका हिंसात्मक आक्रमणहरूमाथि हावी भएको देखाएको बताएको छ ।

निर्वाचन आयोग, नेपालले अत्यन्त छोटो समयसीमाभित्र निर्वाचन सम्बन्धी बन्दोबस्त मिलाउने कामहरू सफलतापूर्वक सम्पन्न गरेको भए पनि, आयोगको काममा पारदर्शिताको उल्लेख्य अभाव रहेको र यसले निर्वाचन प्रक्रियालाई प्रभावित पारेको पनि इयु इओएमको टिप्पणी रहेको छ ।

केन्द्रीय स्तरमा राजनीतिक दल, नागरिक समाज र पर्यवेक्षकहरूसँग नियमित रूपमा परामर्श गर्ने कुनै संयन्त्र छैन । इयु इओएमले खासगरी मतपत्रको मिलानसँग सम्बन्धित कार्यविधिगत कमजोरी पारदर्शिताका लागि अहितकर रहेको उल्लेख गरेको छ ।

काठमाडौँमा मिसनको प्रारम्भिक वक्तव्य प्रस्तुत गर्दै इयुका प्रमुख पर्यवेक्षक जेल्याना जोभ्कोले भन्नुभयोः “प्रतिनिधि सभा र प्रदेश सभाका लागि भएको २०७४ को निर्वाचन २०७२ सालको संविधान कार्यान्वयनमा एउटा प्रमुख कोसेढुंगा रहेको छ । निर्वाचन प्रक्रियालाई विफल बनाउने उद्देश्यले गरिएका हिंसाका बाबजुद, निर्वाचनका दुवै दिनमा मतदाताहरू अविचलित रहेको देखियो । बरु, देशैभर दशौँ लाख मानिसहरू शान्ति, स्थायित्व र समृद्ध नेपालका लागि आफ्नो मतदान गर्न गए ।”

चुनाव सम्बन्धी कार्यमा खटिएका निर्वाचन अधिकारी र सुरक्षाकर्मीसमेत कम्तीमा पाँच लाख मानिसहरूलाई मतदान गर्ने अवसरबाट वञ्चित गरेर निर्वाचनका क्रममा मतदानको अधिकार ठूलो मात्रामा सीमित गरिएकोतर्फ इयु इओएमले जोड दिएको छ ।

मंसिर १० र २१ गते गरी १०० भन्दा बढी इयु पर्यवेक्षकहरूले सबै सात प्रदेशका ६१ जिल्लाका ६३३ मतदान केन्द्रमा मतदान प्रारम्भ, मतदान कार्य र मतदान समाप्ति प्रक्रियाको अवलोकन गरेका थिए ।