हवाई दुर्घटनाको कारण र दोषी पत्ता लगाई कडा कारवाहीको माग

काठमाडौं, २९ फागुन । राष्ट्रिय जनमुक्ति पार्टीले हिजो त्रिभुवन अन्तर्राष्ट्रिय विमानस्थलमा भएको अकल्पनीय र हृदयविदारक हवाई दुर्घटनाबाट पार्टी स्तव्ध र मर्माहत भएको जनाएको छ । अध्यक्ष केपी पालुङ्गवाद्वारा जारी विज्ञप्तिमा उक्त घटनाले पार्टीलाई गम्भीर बनाएको उल्लेख छ ।

विज्ञप्तिमा नेपालको एकमात्र अन्तर्राष्ट्रिय विमानस्थलमा युएस बङ्लाको विमान दुर्घटनाग्रस्त हुँदा भएको मानवीय क्षतिप्रति गहिरो दुःख व्यक्त गर्दै मृतकप्रति श्रद्धाञ्जलि र शोकसन्तप्त परिवारजनमा हार्दिक समवेदना प्रकट गरिएको छ ।

घाइतेहरुको यथोचित उपचार र शीघ्र स्वास्थ्यलाभको कामना गर्दै राष्ट्रिय जनमुक्ति पार्टीले हवाई दुर्घटनाको वास्तविक कारण पत्ता लगाई दोषीमाथि कडा कारवाहीको माग गरिएको छ । छानविनका नाममा विगतमा जस्तो कर्मकाण्डीय काम नदोहोराउन पनि राजमुपाले आग्रह गरेको छ । देशको एकमात्र र ठूलो अन्तर्राष्ट्रिय विमानस्थललाई सुरक्षित र आधुनिक प्रविधियुक्त बनाउन पनि पार्टीले सरकारसँग माग गरेको छ ।