ओमानमा दश महिनाको अवधिमा ६० नेपालीको उद्धार, २ अझै जेलमा

दीपक रम्तेल

ओमान, ८ चैत । ओमानमा पछिल्लो दश महिनाको अवधिमा ६० नेपालीको उद्धार गरिएको छ । ओमानस्थित नेपाली राजदूतावासका अनुसार २ जना नेपाली अझै जेलमा छन् भने ६ जनाको मृत्यु भएको छ । त्यस्तै, ओमानका अस्पतालहरुमा ४ जनाले उपचार गराइरहेका छन् ।

नेपाली राजदूतावासले ओमानस्थित नेपाली संघसंस्थाहरु तथा पत्रकारहरुको माझ विगत १० महिनामा गरेका कामहरुबारे जानकारी गराएको हो । ओमानका लागि नेपाली राजदूत शर्मिला पराजुली ढकाल तथा गैरआवासीय नेपाली संघका सचिव डीबी क्षेत्रीले पानसमा दीप प्रज्वलन गरी उद्घाटन गरेका थिए ।

दूतावासका तृतीय सचिव लालबहादुर अर्यालले विगत १० महिनाको अवधिमा महिला र पुरुष गरी ६० जना नेपालीको उद्धार गरिएको जानकारी गराएका हुन् । तृतीय सचिव अर्यालका अनुसार हाल जेलमा २ जना छन् भने यो अवधिमा ६ जनाको मृत्यु भएको छ । त्यस्तै, ४ जना नेपालीहरुले ओमानका विभिन्न अस्पतालहरुमा उपचार गराइरहेका छन् ।

त्यसपछि केही नेपाली संघसंस्थाहरुका प्रतिनिधिहरुले नेपाली दूतावासका विविध कार्यहरुको प्रशंसा गरेका थिए । सहभागी उमा आचार्य तथा अनिता तामाङले खाडी मुलुकबाट छुट्टीमा घर जाने महिला घरेलु कामदारहरुलाई आउन नदिएको व्यवस्था दोषपूर्ण रहेको र सो व्यवस्था हटाउन दूतावासले पहल गरिदिनको लागि अनुरोध गरेका थिए ।