काठमाडौंको धर्मस्थलीमा बर्ड फ्लु संक्रमण भेटियो

काठमाडौँ, १२ जेठ – चितवनमा देखिएको बर्डफ्लु संक्रमण काठमाडौंको धर्मस्थलीमा पनि भेटिएको छ । काठमाडौंको तारकेश्वर धर्मस्थलीको एक खोरमा पालिएका हाँस र कुखुरामा बर्डफ्लु देखिएको इपिडिमियोलोजी तथा रोग नियन्त्रण महाशाखाले बताएको छ ।

रोग नियन्त्रण महाशाखा टेकुका अनुसार धर्मस्थलीमा सानो खोरमा पालिएका हाँस र कुखुरामा बर्डफ्लु भेटिएको पुष्टि भएको हो । हिरा तामाङले पालेका सबै हाँस कुखुरा मारिएका छन् ।

बर्ड फ्लु भेटिएपछि शुक्रबार चिकित्सकसहितको टोली प्रभावित क्षेत्रमा खटाइएको थियो ।
महाशाखाका निर्देशक डा. केदारप्रसाद सेन्चुरीका अनुसार बर्डफ्लु देखिएपछि सरकारले उच्च सतर्कता अपनाएको छ । तार्केश्वरबाहेक अन्य ठाउँमा अहिलेसम्म बर्डफ्लु देखिएको छैन ।

तर, संक्रमण बढ्न सक्ने देखिएकाले उच्च सतर्कता अपनाएको जनाइएको छ ।