चोटका कारण पारस बिना नै खेल्दै नेपाली टोली

ट्वेन्टी–ट्वेन्टी विश्वकप क्रिकेटको एसिया क्षेत्रको छनौट अन्तर्गत नेपालले बुधबार नेपालले मलेसियासँग प्रतिस्पर्धा गर्दैछ । वर्षाका कारण खेल सुरु हुन ढिलाइ भएको छ ।

मंगलबार भएको पहिलो खेलमा कतारसँग चार विकेटले पराजित भएको नेपाली टोली समस्यामा छ । नेपालका लागि अर्को समस्या कप्तान पारस खड्काको चोट बनेको छ ।

उनी कतारसँगको खेलमा सुरुदेखि नै समस्यामा देखिएका थिए । तर उनले खेले । मंगलबार बेलुका डाक्टरसँगको सल्लाहपछि उनी बुधबार मलेसिया विरुद्धको खेलमा मैदानमा नहुने पक्का भएको हो ।

मलेसियासँगको खेलमा नेपालको कप्तानीको जिम्मा उपकप्तान ज्ञानेन्द्र मल्लले पाएका छन् । पहिलो खेलमा हारेको नेपालका लागि अब सबै खेल जित्नु पर्ने दबाब छ ।

यो प्रतियोगितामा नेपालसहित सिंगापुर, कतार, मलेसिया र कुवेत सहभागी छन् । प्रतियोगिताको विजेताले ग्लोबल छनौटमा स्थान बनाउने छ ।