राष्ट्रपतिमा विद्यादेवी भण्डारीलाई नै अघि सार्नुका ३ कारण

काठमाडौं,  फागुन २३ । नेकपा एमालेले वर्तमान राष्ट्रपति विद्या भण्डारीलाई नै राष्ट्रपतिको उम्मेदवार बनाउने निर्णय गरेको छ । मंगलवार बेलुकासम्म बसेको स्थायी समिति बैठकले भण्डारीलाई नै राष्ट्रपतिको उम्मेदवार बनाउने सर्वसम्मत निर्णय गरेको हो ।

राष्ट्रपतिमा पार्टीका पूर्व अध्यक्ष तथा पूर्व प्रधानमन्त्री झलनाथ खनाल पनि आकांक्षी देखिनु भएको थियो । बैठकमा खनालको नाममाथि पनि छलफल चले पनि भण्डारीको नाम सर्वसम्मतीले निर्णय गरेको हो ।

भण्डारी नै किन ?
संविधानसभाले संविधान जारी गरेपछि ११ कात्तिक २०७२ मा गणतन्त्र नेपालको दोस्रो राष्ट्रपति निर्वाचित भण्डारीको कार्यकाल करिव २ वर्ष मात्रै ब्यतीत भएको छ । संक्रमणकालीन राजनीतिक चरणमा राष्ट्रपति भएकाले सामान्यतया ५ वर्षको हुने कार्यकालमा भण्डारीले २ वर्ष मात्रै काम गर्नु भएकाले पनि उहाँलाई नै पूर्ण कार्यकालका लागि राष्ट्रपतिमा अघि सार्ने निर्णय एमालेले गरेको हो । राजनीतिक मेलमिलाप र सामाजिक एकताको दृष्टिले राष्ट्रपति भण्डारीका ब्यवहार सकारात्मक सन्देशकारी बन्न पुगेकाले पनि उहाँलाई नै पुनः अगाडि सार्ने वातावरण बनेको हो ।

दोस्रो कारण भण्डारीले राष्ट्रपति पदको आफ्नो कार्यकाल विवादरहित रुपमा कार्यसम्पादन गरेर विताउनुभयो । राजनीतिक दलहरुबीच विवादित विषयमा पनि पर्याप्त समय लिएर राष्ट्रपतीय भूमिका निर्वाह गर्नुभएकी राष्ट्रपति भण्डारीले संविधानसँग असन्तुष्ट रहेका तराई केन्द्रित दलहरुसँग पनि निरन्तर संवाद गरिरहनु भयो ।

तत्कालीन सत्तारुढ दल नेपाली कांग्रेसका सभापति तथा तत्कालीन प्रधानमन्त्री शेरबहादुर देउवाले पनि राष्ट्रियसभा निर्वाचन सम्बन्धी अध्यादेश राष्ट्रपति भण्डारीबाट जारी भएपछि ‘राष्ट्रपतिबाट न्याय पाएको र राष्ट्रपतिले पक्षपातपूर्ण ब्यवहार नगरेको’ अभिब्यक्ति दिनुभएको थियो । तर, नयाँ जनादेश प्राप्त सरकार बनेपछि कामचलाउ सरकारले सिफारिस गरेका राष्ट्रियसभा सदस्यको नाम जनादेश प्राप्त सरकारले फिर्ता गरेपछि भने कांग्रेस राष्ट्रपति विरुद्ध आरोपमा उत्रेको थियो ।

संविधान जारी भएपछि संविधानप्रति असन्तुष्ट रहेका तराई केन्द्रित दललाई राजनीतिको मूलधारबाट बाहिर जान नदिन विशेष भूमिका निर्वाह गर्नु भएकी राष्ट्रपति भण्डारीले त्यसबीचमा प्रमुख दल र तराई केन्द्रित दलबीच सघन संवाद गर्नुभएको थियो ।

एमालेका वैचारिक प्रणेता स्वर्गीय मदन भण्डारीकी जीवन संगिनी समेत रहनु भएकी राष्ट्रपतिको पारीवारिक संरचना पनि जातीय तथा सामुदायिक एकताका लागि प्रेरणादायी बन्न पुग्यो । मधेसी मुलसँग आफ्नो पारीवारिक नाता विस्तार गरी उहाँले त्यस्तो सार्वजनिक सन्देश दिनु भएपछि सर्वत्र प्रशंसा भएको थियो ।

नयाँ राष्ट्रपति चयनका लागि आज बुधबार उम्मेदवारी दर्ताको समय तोकिएको छ । विहान १० वजेदेखि उम्मेदवारी दर्ताको समय छ । प्रतिपक्षी दल कांग्रेसले पनि आजै केन्द्रीय कार्यसमितिको बैठक बसी उम्मेदवार तय गर्ने जनाएको छ । फागुन २९ गते राष्ट्रपति पदका लागि मतदान हुनेछ । राष्ट्रपति चुन्न प्रदेशसभा, प्रतिनिधिसभा र राष्ट्रियसभा सदस्यहरको निर्वाचक मण्डल रहनेछ । जसमा एमाले र माओवादीको वाम गठबन्धन प्रचण्ड बहुमतमा छ । (स्रोत : चक्रपथ डटकम)