वीरगञ्जका मतदाताको अठोट-पहिलेकाले दिए चोट, अब विकास गर्नेलाई भोट

२१ कात्तिक, वीरगञ्ज । आसन्न प्रदेश र प्रतिनिधिसभा चुनावका लागि मनोनयन दर्ताको प्रक्रिया सकिएसँगै पर्सामा उमेदवारहरुले चुनावी प्रचारप्रसार तीव्र पारेका छन् ।

दोश्रो चरणमा हुने निर्वाचनका लागि गत बिहीबार मनोनयन दर्ता गरेका दलका तथा स्वतन्त्र उम्मेदवारहरुले घरदैलो अभियान, पार्टी र समाजका अगुवा अथवा नेता कार्यकर्ताहरुसँगको भेटघाट, बैठक, भेला मार्फत चुनावी प्रचारप्रसारलाई तीव्रता दिएका हुन् ।

कतिपय उम्मेदवारहरुले त स्थानीय एफएम रेडियो मार्फत पनि आफ्ना प्रचार सामग्री प्रसारण गरिरहेका छन् ।

पर्सामा चार प्रतिनिधी सभा सदस्य र आठ प्रदेशसभा सदस्यका लागि दल र स्वतन्त्रबाट गरी एक सय ६७ जनाको उम्मेदवरी परेको छ ।

दल र उम्मेदवारहरुले मतदाताको घर दैलोमा पुगेर मत माग्ने क्रम सुरु भएको छ । आसन्न चुनावमा आफ्ना उम्मेदवारहरुको पक्षमा जनमत सृजना गर्न उम्मेदवार बाहेकका नेता कार्यकर्ताहरु पनि निरन्तर खटिरहेका छन् ।

दल तथा उम्मेदवारहरुले आ-आफनो क्षेत्रमा चुनावी प्रचारप्रसार र सम्पर्क कार्यालय पनि स्थापना गरेका छन् ।

चुनावको प्रचारप्रसार सुरु भएसँगै शहरदेखि गाँउसम्मका चोक, बजार, टोलहरुमा चुनावी चहल पहल पनि बढेको छ ।

यससँगै गाउँमा उम्मेदवार कहिले आउलान र गाउँका समस्या समाधानको प्रतिबद्धता लिन सकौं भनेर मतदाता पनि आतुर देखिएका छन् । वीरगञ्ज महानगरपालिका भनिएपनि उसका अधिकांश वडा गाउँ जस्तै छन् ।

वीरगञ्ज नगरपालिका हुँदा नै थपिएका ११ वटा वडा -तत्कालीन ११ गाविस) मा विकासका पूर्वाधार तयार हुन सकेका छैनन् ।

पहिले जितेर गएका नेताहरुले विकासका काम खासै गर्न नसकेको बताउने मतदाताहरु अबको चुनावबाट निर्वाचनबाट जितेर जाने प्रतिनिधिहरुले विकासका काम गर्नेमा आशावादी भने छन् ।

विकास गर्नेलाई भोट

पटकपटक नेताहरुबाट धोका खाइसकेको मतदाताहरु जितेर जाने तर काम नगर्ने खालका उम्मेदवारलाई भोट नदिने अडानमा छन् ।

वीरगञ्ज-२९ बसडिल्वाका ६८ वर्षीय भगवान महतो गरीब र धनी दुवैलाई सम्झेर विकासका काम गर्नेलाई भोट दिने सोचमा छन् । ‘ नगरको जस्तो सुविधा छैन, महानगरपालिका भनेको छ, नाम मात्रै राखेर हुन्छ र ?’ उनी प्रश्न गर्दै भन्छन्, ‘विगतमा यस्तो गर्छु, उस्तो गर्छु भनेर भोट लिएर गए केही गरेनन् ।

डाहा नदी घर घरमा पसेर गाउँबासी हैरान छौं, अब त्यस्तालाई भोट दिँदैनौं, भेडाहा नदी नियन्त्रणका लागि काम गर्ने, गाउँको सडक बनाउन जो तयार हुन्छ । उसैलाई भोट दिन्छौं ।’

सोही टोलका ७० वर्षका राम जतन महतोले पनि भगवानको कुरामा हो मा हो मिलाए । ‘सबैभन्दा मुख्य समस्या त नदीनै बनेर आएको छ । साउनमा आएको बाढी घर घरमा पस्यो, नदी पार गर्ने पुल पनि छैन ।’ उनले थपे ।

बसडिल्वाकै ५० वर्षीय जगरनाथ ठाकुर लोहार पनि भेडाहा खोलाका कारण पीडित छन् । नदीमा पुल बनाउने, सडक नाला जस्ता विकासका काम गर्ने विकास प्रेमी नेता चुनिएर आउन भन्नेमा उनको चाहना छ । ‘रोड चाहियो, नाला चाहियो, नदीको निकास राम्रो हुनुपर्‍यो, गाउँमा पानी पस्नु भएन, विकासको कामहरु गर्ने हुनुपर्‍यो,’ ठाकुरले भने, ‘ पार्टी भन्दा व्यक्ति हेरेर भोट दिन्छौं ।’

विगतमा नेताहरुको बहकाउमा आएर भोट दिएको भएपनि वीरगञ्ज २८ इनर्वाका अदालत मियाँ यसपटक स्पष्ट छन् । ‘चुनाव जितेर जान्छन्, केही गर्दैनन्, त्यस्तालाई भोट दिइदैन,’ मियाँ भन्छन्, ‘ स्कुल छ, गतिलो पढाई छैन, सडक छ, नाला छैन, सडक ठाउँ ठाउँमा भत्किएको छ । यी विकासका कामहरु जितेर गएपछि जसले गर्छ भन्ने विश्वास हुन्छ । उसैलाई भोट दिन्छु ।’

अदालतकै गाउँका ६५ वर्षका दुःखी राउत महानगर नामले मात्रे नहुने विकासका पूर्वाधार पनि खडा हुनुपर्ने बताउँछन् । ‘महानगर नाम राखेर मात्रै भएन, त्यही अनुसारको सुविधा पनि दिन सक्नुपर्छ,’ उनी भन्छन्, ‘ गाउँमा सडक, नाला, पानी बिजुली सिंचाईको व्यवस्था हुनुपर्छ । जसले यी काम गर्ने प्रतिवद्धता ल्याउँछन् । तिनैले भोट पाउँछन् ।’

अन्य समुदायका मात्र नभएर दलित समुदायका मतदाता पनि सचेत भएको देखिन्छन् । आरनमा फलामको काम गरिरहेको अवस्थामा भेटिएका ५८ वर्षीय पारस ठाकुर लोहार रक्सी मासु र पैसामा बिकेर भोट दिन नहुने बताउँछन् । ‘महानगरको विकास चाहिन्छ, सडक नालाको निकास चाहिन्छ,’ उनले भने,’ झुठो आश्वासन र प्रलोभनमा परेर भोट खसाइन्न ।’