सभामुखबारे छलफल गर्न काँग्रेस पदाधिकारी बैठक जारी

काठमाडौँ । सभामुखको निर्वाचन तयारीको विषयमा छलफल गर्न नेपाली काँग्रेसको पदाधिकारी बैठक सुरु भएको छ ।

पार्टी सभापति शेरबहादुर देउवाको निवास धुम्बाराहीमा बैठक बसेको हो ।बैठकमा सभामुखको निर्वाचन तयारीको विषयमा छलफल हुने बताइएको छ ।

संसद्मा आज सभामुख मनोनयन दर्ता गर्ने कार्यसूची छ । सभामुखको उम्मेदवार कसलाई उठाउने भन्नेबारे छलफल गर्न काँग्रेस पदाधिकारी बैठक बसेको हो।

काँग्रेसले सभामुखको उम्मेदवार बनाइसकेको छैन । पार्टीले उम्मेदवारी नदिएको खण्डमा पनि कसलाई समर्थन गर्ने भन्नेबारेमा छलफल हुनेछ ।

काँग्रेसमा विमलेन्द्र निधि र अर्जुननरसिंह केसी सभामुखको उम्मेदवारका आकाङ्क्षी हुनुहुन्छ । यदि काँग्रेसले उम्मेदवारी नदिएमा एकीकृत समाजवादीले उठाउने उम्मेदवारलाई समर्थन गर्ने बुझिएको छ । एकीकृत समाजवादीमा राजेन्द्र पाण्डे र भानुभक्त जोशी सभामुखका आकाङ्क्षी हुनुहुन्छ।

काँग्रेसले राष्ट्रपतिको निर्वाचनमा मात्र ध्यान दृष्टि दिएको छ । मङ्गलवार बसेको सर्वदलीय बैठकमा पनि काँग्रेसले राष्ट्रपतिमा उम्मेदवार उठाउने स्पष्ट पारिसकेको छ ।