ओली र प्रचण्ड गोर्खा र लम्जुङ जाँदै

काठमाडौं, २९ कार्तिक। नेकपा एमालेका अध्यक्ष केपी शर्मा ओली र नेकपा माओवादी केन्द्रका अध्यक्ष पुष्पकमल दाहालले बुधबार लम्जुङ र गोर्खाका पाँच चुनावीसभालाई सम्बोधन गर्ने छन्।

संयुक्त चुनावीसभा शुरुवात गर्न दुवै नेताहरु बिहान ११ बजे लम्जुङको बेसिशहर पुग्ने कार्यक्रम रहेको छ । ‘दुवै अध्यक्षहरुले बुधबार लम्जुङ र गोर्खामा पाँच चुनावी सभालाई सम्बोधन गर्ने कार्यक्रम छ’ अध्यक्ष ओलीका प्रेस संयोजक चेतन अधिकारीले भने, ‘चुनावीसभालाई सम्बोधनपछि साँझ राजधानी फर्किने हुनेछ।‘ दुवै नेताहरु फरक फरक हेलिकप्टरमा लम्जुङ र गोर्खा जाने छन्।

बुधबार गोर्खाको अरुघाट, भैरुङ, पालुङटार र भट्टेकमा आयोजना हुने कार्यक्रमलाई सम्बोधन गर्ने छन्। लम्जुङ र गोर्खा दुवै पहिलो चरणमा चुनाव हुने क्षेत्रहरु हुन्।

पूर्व प्रधानमन्त्री तथा नयाँ शक्ति पार्टीका अध्यक्ष बाबुराम भट्टराई र नेकपा माओवादी केन्द्रका नेता तथा पूर्व प्रधानमन्त्री नारायणकाजी श्रेष्ठको चुनावी प्रतिस्पर्धामा रहेको कारण गोर्खा -२ मा देशव्यापी रुपमा चर्चामा रहेको छ ।

पार्टी एकता गर्ने घोषणा गरेका दुवै दलले त्यसका प्रारम्भ चुनावी तालमेल भएको बताएका छन्। दुवै अध्यक्ष १४ वटा संयुक्तसभालाई सम्बोधन गर्ने कार्यक्रम रहेको छ।