झापा जाँदै गरेको जीप एकाबिहानै दुर्घटना, ६ को मृत्यु, ४ घाइते

धनुषा, १३ माघ । काठमाडौंबाट झापा जान लागेको बा९च ३३१४ नम्बरको टाटा सुमो धनुषाको गणेशमान चारनाथ–८ पोर्तहा भन्ने ठाऊँमा आज बिहान ३ बजे दुर्घटना हुँदा ६ जनाको ज्यान गएको छ । ४ जना घाइते छन् ।

मृतकहरु सबैको सनाखत भएको जिल्ला प्रहरी कार्यालय धनुषाका एसपी चक्रबहादुर सिंहले बताए । मृत्यु हुनेमा विराटनगरका शारदा रेग्मी दाहाल, खोटाङ निर्मलडाँडाका ज्ञानबहादुर चौहान, मोरङका बलराज न्यौपाने, मोरङ लेटाङ ८ का खेमकुमार रानामगर, पाँचथर रवि छ का प्रनिता राई, संखुवासभा धर्मदेवी वडा न ९ का नयाराज जिमी रहेको एसपी सिंहले बताए ।

चार जना घाइते छन् । घाइतेमध्ये संखुवासभाका छत्रबहादुर जिमीको अवस्था गम्भीर रहेको एसपी सिंहले बताए । घाइतेहरुको जनकपुर अञ्चल अस्पतालमा उपचार भइरहेको छ ।

गाडीभित्र ११ जना यात्रु रहेको सशस्त्र प्रहरी बेसक्याम्प रघुनाथपुरका प्रमुख सशस्त्र प्रहरी निरीक्षक अनिल कार्कीले बताए । घटनास्थलबाट कार्कीले दिएको जानकारी अनुसार दुर्घटनापछि सुमो पोखरीमा डुबेको छ । ६ जनाको पोखरीको पानी खाएर मृत्यु भएको हुनसक्ने उनले प्रारम्भीक अनुमान गरेका छन् । ५ जना यात्रु गाडीको सिसा फोरेर बाहिर निस्किएको कार्कीले बताए ।

पाँचथरमा जीप खस्दा २ जनाको ज्यान गयो
त्यसैगरी, पाँचथरको याङ्वरक गाउँपालिका–३ मा गएराति ११ बजे जीप दुर्घटना हुँदा २ जनाको घटनास्थलमै मृत्यु भएको छ । पाँचथरकै बारिबुङ्गबाट योयाङ्ग बजारतर्फ यात्रु लिएर जाँदै गरेको ग १ ज ६० ८५ नम्बरको जीप सडकबाट अन्दाजी ३ सय मिटर तल खस्दा ६ जना यात्रु घाइते भएका छन् ।

जिल्ला प्रहरी कार्यालय पाँचथरले दिएको जानकारी अनुसार, दुर्घटनामा याङ्वरक गाउपालिका–३ का १९ वर्षीय प्रवेश योङ्या र १६ वर्षीय सन्दीप योङयाको मृत्यु भएको छ ।

दुर्घटनामा घाइते ६ जनालाई उपचारका लागि झापा पठाइएको प्रहरीले जनाएको छ ।