सुन काण्डमा मुछिएपछि प्रहरीलाई मिसनबाट फिर्ता बोलाइयो

अश्बिन खड्का, २३ वैशाख- राष्ट्रसंघीय शान्ति मिसनमा पुगेका एक प्रहरी सुन काण्डमा मुछिएपछि फर्काइएको छ । मिसनमा रहेका प्रहरी हवल्दार अम्बरबहादुर थापालाई फिर्ता बोलाएर मोरङ अदालतमा पेश गरिएको हो ।

थापा त्रिभुवन अन्तर्राष्ट्रिय विमानस्थलका कार्यरत रहेका बेला एसएसपी श्याम खत्रीको निर्देशनमा सुन ओसार्ने गतिविधिमा संलग्न थिए। गृह मन्त्रालयद्वारा गठित छानबिन समितिले तस्करीमा उनको समेत संलग्नता रहेको भेटाएपछि पछि प्रतिवादी बनाउन सिफारिस गरेको थियो। र उनलाई शान्ति मिसनबाट फिर्ता बोलाइएको हो। सुन तस्करीमा सहयोग गर्ने एसएसपी खत्री भने फरार छन्।

मुख्य अभियुक्तलाई जोगाउने प्रयास गरेको अभियोगमा एसएसपी दिवेश लोहनी, डिएसपी प्रजित केसी र सइ बालकृष्ण सञ्जेल पक्राउ परिसकेका छन् । सुन तस्करी र हत्या मुद्दामा पक्राउ पर्नेको संख्या ३० पुगेपनि मुख्य नाइके चुडामणि उप्रेती गोरे सहित ३३ जना अझै फरार छन्। पक्राउ पर्नेको हाल जिल्ला अदालत मोरङमा थुनछेक बहसको मुद्दा र बयानको क्रम चलिरहेको छ।