बलिया टिमलाई पाखा लगाउँदै फाइनलसम्म पुगेकाे क्रोएसियाबारे जान्नै पर्ने कुराहरु

विश्वकप फुटबल सुरु हुनु पूर्व र सुरु भएपछि पनि धेरैले सम्भावित विजेताको रुपमा लिने गरेका नाम थिएन ।

सबैले सम्भावित विजेताको रुपमा लिएका थिए, ब्राजिल, जर्मनी, स्पेन, अर्जेन्टिना, पोर्चुगल वा अरु यस्तै बलिया टिमलाई । तर खेल अघि बढ्दै जाँदा यी सबै टिम एक पछि अर्को गर्दै घर फर्किए ।

अनि अर्को एक टिम एक पछि अर्को खेलमा जित निकाल्दै सम्भावित विजेताको सूचिमा आफूलाई सबैभन्दा अघि ल्याउँदै गयो, जसलाई सायद निकै कमले मात्र यहाँसम्म आइपुग्ने सोचेका थिए । त्यो देश हो, क्रोएसिया ।

रुसमा विश्वकपका खेलअरु ज्ति अघि बढ्दै गए त्यति नै उसले सबैलार्य ‘सरप्राइज’ पार्दै गयो । आफ्नो सपनाको यात्रामा बलियो बनाउँदै लग्यो ।भव्य नाम र उस्तै खेल कौशल भएका स्टार खेलाडीका टिम घर फर्किँदा सामान्य चर्चामा रहेका तर बलियो आत्मबल भएका खेलाडीको टिम क्रोएसियाले जित अनि जित निकाल्दै आएको छ ।

उसले पछिल्लो पटक बुधबार राति मस्कोमा भएको सेमिफाइनलमा युवा टिम अनि सर्वाधिक गोलकर्ता ह्यारी केनको कप्तानीमा रहेको इंग्ल्याण्डलाई रोमाञ्चक रुपमा पाखा लगायो ।

सुरुमा पछि परेर पनि क्रोएसियाले ग्यारेथ साउथ गेटको टिमलाई २–१ ले हराउँदै पहिलो पटक विश्वकपको फाइनलमा स्थान बनायो । र अब उ कमैले सोचेको तर अब सम्भव जस्तै देखिँदै गएको विश्व विजेता बन्ने संघारमा पुगेको छ ।युरोपको यो सानो देशले अब फाइनलमा उपाधिका लागि फ्रान्ससँग प्रतिस्पर्धा गर्ने भएको छ । ४२ लाख भन्दा केही बढी मात्रै जनसंख्या रहेको यो देश युगोस्लाभियाबाट स्वतन्त्र भएको धेरै भएको छैन । सन् १९९१ म स्वतन्त्र भएको यो देश पाँच वर्षअघि मात्रै युरोपियन युनियनमा प्रवेश गरेको हो । यो देशले स्वतन्त्र भएयताका ६ विश्वकप मध्ये पाँच पटक खेलेको छ । यसअघि सन् १९९८ को विश्वकपमा क्रोएसिया सेमिफाइनलसम्म पुगेको थियो ।

मध्य तथा दक्षिण पूर्वी युरोपको बिचभागमा रहेको यो देश एड्रियाटिक सागरको नजिक छ । निकै सुन्दर देश क्रोएसियाको राजधानी जाग्रेब हो ।

यो टिमलाई अहिले विश्वकपको फाइनलसम्म ल्याउनुमा लुका मोड्रिक, मारियो मान्जुरकी, इभान पेरिसिकसहितका खेलाडीको भूमिका ठूलो छ । राजनीतिक अस्थिरता र हिंसात्मक संघर्ष लामो समय भोगेको क्रोएसियाले फुटबलमा ठूलो सफलता हाँसिल गरेको छ ।

क्रोएसियाको फाइनलसम्मको यात्रा

इंग्ल्याण्डका ट्रिपिएरले पाँचौँ मिनेटमा नै फ्रि–किकबाट गोल गर्दै अग्रता दिलाए पनि नतिजा क्रोएसियाको पक्षमा गयो बुधबार राति भएको सेमिफाइनलमा । ६८ औँ मिनेटमा इभान पेरिसिकले गोल फर्काएसँगै क्रोएसिया खेलमा फर्कियो ।

खेल अतिरिक्त समयमा धकेलियो १०९ औँ मिनेटमा मान्जुकीले सुन्दर गोल गरे र टिमलाई ऐतिहासिक सफलता दिलाए, क्रोएसिया पहिलो पटक विश्वकपको फाइनलमा पुग्यो ।

रुस विश्वकपमा क्रोएसियाले सबै खेलमा राम्रो गरेको छ । समूह चरणमा क्रोएसिया समूह डी मा थियो।पहिलो खेलमा एउटा उपाहार (आत्मघाती) गोल र पेनाल्टीमा लुका मोड्रिकले गरेको गोलबाट नाइजेरियालाई २–० ले हराएर विजयी सुरुवात गरेको टिमले दोस्रो खेलमा ऐतिहासिक सफलता हात पार्‍यो । उसले उपाधि दाबेदार मानिएको लियोनल मेस्सीको टिम अर्जेन्टिनालार्य ३–० ले पराजित गर्न सफल भयो ।

यो खेलमा रिबिक, मोड्रिक र रेकिटिकले गोल गरे । समूह चरणको अन्तिम खेलमा आइसल्याण्डलाई २–१ ले हराउँदै उसले समूह विजेताको रुपमा अन्तिम १६ मा स्थान बनायो ।नकआउट चरणको पहिलो खेलमा उसले प्रतिस्पर्धी पायो बलियो टिम डेनमार्क । तर १–१ को बराबरी भएपछि पेनाल्टी सुटआउटमा गएको खेलमा क्रोएसियाले ३–२ ले नतिजा आफ्नो पक्षमा पार्न सफल भयो ।

क्वाटरफाइनलमा पनि उसले पायो आयोजक देश रुस प्रतिस्पर्धी । यो खेलमा २–२ को बराबरी भयो र फेरि निर्णयका लागि पेनाल्टी सुटआउट । त्यसमा क्रोएसियाले नतिजा ४–३ ले आफ्नो पक्षमा ल्यायो ।

यसरी सेमिफाइनलमा आएको उसले इंग्ल्याण्डलाई पछि परेको अवस्थाबाट फर्किएर पराजित गर्न सफल भयो र अब फाइनल यात्रामा छ ।आउँदो आइतबार मस्कोमा हुने फ्रान्ससँगको फाइनलमा उसले नयाँ इतिहास लेख्ने सम्भावना छ । क्रोएसिया विश्वकपका पछिल्लो तीन खेलमा सुरुमा १–० ले पछि परेको छ र हरेक पटक पुनरागमन गर्दै जित निकाल्न सफल भएको छ ।

प्रशिक्षक ज्लाट्को डालिकलाई आफ्नो टिममाथि विश्वास छ र विश्वकप उचाल्नेमा आत्मबलसहितको भरोसा पनि ।