अपहरणकारीले १ करोड २ लाख फिरौती रकम लिएर ९ वर्षे बालकको हत्या

शिखरन्युज १० साउन । बाराको जितपुरमा १ करोडभन्दा बढी फिरौती लिएर पनि अपहरणकारीले एक बालकको हत्या गरेका छन् । अपहरणकारीले बारा जितपुरका गोला व्यापारी ललन गुप्ताका ९ वर्षीय छोरा अंकितलाई अपहरण गरेका थिए । अपहरणकारीले मागेको फिरौती रकम तिरेपछि छोरा सकुशल फिर्ता आउने आसमा १ करोड रकम बुझाएका थिए । तर, बालक अंकित फिर्ता आएनन् ।

अपहरणकारीका थुप्रै शर्त अनुसार ललनले छोरालाई कुनै यातना नदिई सकुशल फिर्ता गर्नुपर्ने भन्दै १ करोड २ लाख रुपियाँ बुझाएका थिए । फिरौती रकम अपहरणकारीलाई बुझाएको एक सातापछि अंकितको हत्या भएको खबर आएको हो । अपहरणकारीले अंकितलाई कुटपीट नगरी सकुशल रिहा गर्ने मोवाइल कुराकानीमा वाचा गरेको थियो ।

छोरा फिर्ता आउने आसमा ललन र उनकी पत्नी संगीता भारतको बेतिया पुगेर ६४ लाख भारतीय रूपैयाँ बुझाएका थिए । फिरौती रकम माग्न भारतीय फोन नम्बर प्रयोग गरिएको थियो ।
बारा प्रहरी कार्यालयले अंकितको हत्या भइसकेको हुनसक्ने बताएपछि सिंगो जितपुर शोकमा डुबेको छ ।

अंकित जेठ २२ गते साँझ घर नजिकै साथीकोमा खेल्न गएका थिए । त्यहीबेला अंकित अपहरणमा परेका थिए । रातिसम्म घर नफर्किएपछि गुप्ता परिवारले प्रहरीलाई खबर गरेका थिए ।
ललनका ५ छोरी र २ छोरामध्ये अंकित कान्छा छोरा हुन् । सोही दिनदेखि घटनाको अनुसन्धान थालेको बारा प्रहरीले ५०औं दिनमा साउन ८ गते अंकितको हत्या भएको हुनसक्ने बताएको छ ।
घटनामा संलग्न रहेको आरोपमा पर्साको पोखरिया घर भई वीरगन्ज बस्ने रामप्रवेश साह गोढलाई पक्राउ गरेको छ । साहलाई पक्रेपछि अंकित हत्याको रहस्य खुलेको हो ।

साहले फिरौती रकम लिएपछि अंकितको हत्या गरी पर्साको जगरनाथपुरस्थित गण्डक नहरमा बोरामा हालेर शव फालेको बयान दिएका थिए । असार ३२ गते अंकितको हत्या गरी फालिएको पक्राउ परेका साहले बयान दिएका थिए ।

शव भेटिएको बेला अनुहार चिन्न नसक्ने भैसकेको थियो । शवलाई बेवारिसे भन्दै यस अघि नै गाडिसकेको थियो । घटनाको रहस्य खुल्दै गएपछि बारा प्रहरीले शव उत्खनन् गर्दै डीएनए परीक्षण शुरु गरिएको छ । बालकको लुगा र घाँटीमा लगाएको हनुमानको लकेटको आधारमा शव अंकितको हुनसक्ने अनुमान गरिएको छ ।