जब डोनल्ड ट्रम्प अाफ्नै विमानमै बेवकुफ बने…

काठमाडौं, १७ असार ।  संसारका सबभन्दा शक्तिशाली व्यक्ति मानिने अमेरिकी राष्ट्रपति डोनल्ड ट्रम्पलाई उनको सबभन्दा सुरक्षित मानिने विमानमै कसैले बेवकुफ बनाएको छ ।

अमेरिकाका प्रसिद्ध कमेडियन जोन मेलेन्डेजले आफूलाई न्युजर्सीका सिनेटर रोबर्ट मेनेन्डेज बताउँदै बुधवार राष्ट्रपतिको विमान एयरफोर्स वानमा ट्रम्पलाई फोन गरेको बताए ।

मेलेन्डेजले ट्रम्पसँग भएको कुराकानीको रेकर्डिङ आफ्नो कार्यक्रम द शटरिङ जोन पोडकास्टमा पनि प्रसारण गरेका छन् । त्यसमा अर्कोतर्फ ट्रम्पको जस्तै आवाज सुनिएको थियो ।

न्युजर्सीका सिनेटर मेनेन्डेजविरुद्ध भ्रष्टाचारमा अनुसन्धान गरिएको थियो तर पछि सबै आरोप खारिज गरिएको थियो । ट्रम्पले कुराकानीमा यो मुद्दाको कुरा उठाउँदै भने, ‘तपाईं गाह्रो परिस्थितिबाट गुज्रिनुपरेको थियो र त्यो ठीक थिएन जस्तो मलाई लाग्छ ।’

यस क्रममा दुवै नेताले अवैध प्रवासीको मुद्दादेखि न्यायाधीश एन्थोनी केनेडीको सरुवा लगायतका विषयमा कुराकानी गरे । तर कमेडियन मेलेन्डेजले आफूलाई सिनेटरको सहायक बताउँदै ह्वाइट हाउसमा फोन गरेको जसले गर्दा एयरफोर्स वानमा बसेका अमेरिकी राष्ट्रपतिसँग उनलाई सीधै कुरा गराइदिए ।

यस विषयमा ह्वाइट हाउसका तर्फबाट कुनै टिप्पणी गरेको छैन ।