मनाङका गाउँ सुनसान हुन थाले

काठमाडौं । जाडो शुरु भएपछि मनाङबासी जाडो छल्न बेसी झर्न थालेपछि गाउँ सुनसान हुन थालेका छन् । जाडो भएपछि हिमाली जिल्ला मनाङका बासिन्दा सधैंका वर्ष जस्तै यसवर्ष पनि जाडो छल्न बेसी झर्न थालेका छन् ।

१२ महिना नै जाडो हुने मनाङमा मंसिरदेखि माघसम्म अत्याधिक जाडो हुने हुँदा स्थानीय बासिन्दा जाडो छल्न पोखरा, काठमाडौं, चितवन लगायतका स्थानमा सर्ने गर्छन् ।

मनाङमा चिसो बढे पनि बाह्य पर्यटक आउने क्रम भने जारी रहेको अन्नपूर्ण संरक्षण क्षेत्र धारापानीले जानकारी दिएको छ । जाडो याममा हिउँसँग खेल्न, रमाउन चिसो मौसममा पनि पर्यटक मनाङ पुग्ने गरेका छन् ।

मंसिर, पुस, माघमा जाडोबाट जोगिन स्थानीय घर छोडेर बाहिर जाने गरेका छन् । माथिल्लो भेगमा हिउँ पर्न शुरु भइसकेको छ । तल्लो भेगमा पनि विस्तारै हिउँ पर्न थालको छ । चिसो बढेसँगै गाउँघर सुनसान हुन लागेको छ ।