एकैचोटी तीन बालिका हराए, ५ दिनसम्म अत्तोपत्तो छैन
सारांश
- काठमाडौं ।
- सुर्खेतमा तीनजना बालिका एकैपटक हराएका छन् ।
- सिम्ता गाउँपालिका ९, खानीखोला सुर्खेतका तीनजना बालिका पाँच दिनदेखि हराएका हुन् ।
काठमाडौं । सुर्खेतमा तीनजना बालिका एकैपटक हराएका छन् । सिम्ता गाउँपालिका ९, खानीखोला सुर्खेतका तीनजना बालिका पाँच दिनदेखि हराएका हुन् ।
नेपाल राष्ट्रिय मावि सिम्ता कक्षा ९ मा पढ्ने १४ वर्षीया निशा सिंह, त्यसै कक्षामा पढ्ने १५ वर्षीया यमुना खत्री, कक्षा ७ मा पढ्ने उनकी बहिनी १२ वर्षीया रिसिमा खत्री हराएको जिल्ला प्रहरी कार्यालय सुर्खेतले जनाएको छ ।
बालिकाको खोजतलास भइरहेको प्रहरीले बताएको छ । १० गते सिम्ता गाउँपालिकासँग जोडिएको सल्यान जिल्लाको सल्लीबजारबाट गाडी चढेका उनीहरु कहाँ गए भन्ने पत्ता लागेको छैन । ११ गते मात्र प्रहरीलाई जानकारी दिइएको थियो । सबै प्रहरी चौकीमा तीनजनै बालिकाको फोटोसहितको हुलिया दिएर खोजतलास भइरहेको प्रहरीको भनाइ छ ।
पुस १० गते स्कुलबाट हाफटाइममा घर आएर म्याडमले गाली गर्नुहुन्छ भन्दै हतारमा स्कूल गएकी छोरी अहिलेसम्म नफर्केकी निशाकी आमा भगवती सिंहको भनाइ छ । निशा, यमुना र रिसिमा कहाँ छन् थाहा नभएको परिवारले बताएका छन् ।
उनीहरु सल्लीबजारबाट मिलन विकको गाडी चढेका थिए । उनलाई सोध्दा सल्लीबजारबाट निःशुल्क आफ्नो गाडीमा छिन्चु ल्याएको र बुटवल फुपूकोमा जान्छौँ भनेपछि छिन्चुबाट १९०४ नंको बसमा नेपालगञ्ज चढाइदिएको बताएका छन् । उनीहरुलाई नेपालगञ्ज लैजाने १९०४ नंको बसमा प्रहरीले बुझ्दा बालिकाले बुटवल जाने भनेकाले कोहलपुर चौराहमा बुटवल लागि छुट्न लागेको गाडीमा छोडिएको भन्ने बुझिएको तर, फेला पार्न नसकिएको प्रहरीले जनाइएको छ ।
प्रतिक्रिया