एमालेसँग एकता गरे पार्टी फुटाउने धम्की, को हुन् कमाण्डर ?

नेकपा एमालेसँग पार्टी एकताको विषयले नेकपा माओवादी केन्द्रमा विद्रोहको अवस्था सिर्जना भएको छ ।अधिकांश नेता कार्यकर्ता पार्टी एकीकरणको विपक्षमा रहेका बेला एक जना केन्द्रीय नेताले विद्रोहको चेतावनी दिँदै एमालेसँग पार्टी एकताको कडा शब्दमा विरोध गरेका छन् ।

नेता गोपाल किराँतीले यो एकता प्रक्रिया एमालेमा माओवादीको विलय हो भन्दै विद्रोहको संकेत गरेका छन् । उनले माओवादी केन्द्र र एमालेबीच एकता गर्ने र एमालेको घाम चिन्हमा चुनाव लड्नुपर्ने अध्यक्ष प्रचण्डको प्रस्ताव नेपालको आन्तरिक राष्ट्रियता (पहिचान) विरोधी र मारक्सवाद, लेनिनवाद र माओवाद विरोधी रहेको तर्क गरेका छन् । उनले यो कथित एकता वस्तुतः एमालेमा माओवादीको विलय हो भनेका छन् ।

साथै एमालेसँग एकता गर्न लागिपरेका माओवादी नेताहरुलाई दक्षिणपन्थी आत्मसमर्पणवादको संज्ञा दिँदै त्यसविरुद्ध क्रान्तिकारीहरु एकजुट हुन आह्वान गरेका छन् ।

यसबाट उनले पार्टी एकता भए आफू एमालेमा नजाने र माओवादी फुटाएर एकताबाट असन्तुष्ट नेता कार्यकर्ताको नेतृत्व गर्दै अघि बढ्ने संकेत गरेका छन् । किराँतीको विद्रोहलाई अधिकांश कार्यकर्ताले समर्थन गरेका छन् ।

नेता किराँती र अधिकांश नेता कार्यकर्ताको विरोध र असन्तुष्टिका बाबजुद एमालेसँग पार्टी एकता होला कि रोकिएला त्यो हेर्न बाँकी नै छ ।