काठमाडौँमा अनियन्त्रित चौपायाका कारण सडक दुर्घटना बढ्दो(फोटो फिचर)

काठमाडौँ, २२ जेठ । सडकमा अनियन्त्रित रुपमा छाडिएका चौपायाहरुका कारण धेरै सडक दुर्घटना हुने गरेको छ ।

राजधानी लगाएतका अन्य शहरहरुमा रहेका अनियन्त्रित चौपायाको व्यवस्थापन गर्न नसक्दा सडक दुर्घटना बढेको हो ।          

खासगरी गाईले दुध दिन छाडेपछि र गोरु बुढो भएर जोत्न छाडेपछि अनियन्त्रित रुपमा छाड्ने गरीन्छ । त्यसरी छाडीएका चौपाया व्यस्त सडकको बीचमा हिँड्न थालेपछि दर्घटना बढेको हो ।

गाईवस्तुले अवरोध गर्ने सडक मध्ये राजधानीको महाराजगञ्ज बुढानिलकण्ठ सडकखण्ड पनि एक हो । अनियन्त्रित गाई वस्तुले गर्दा आफू पनि मर्कामा परेको बुढानिलकण्ठ नगरपालिकाका मेयर उद्धवप्रसाद खरेलले बताए । यो समस्या समाधानका लागि आफू पहिले देखि नै लागि परेको तर चौपायाको संख्या निकै ठूलो भएकाले यसको व्यवस्थापनमा समस्या भएको उनले बताए ।

यसको दिर्घकालिन समाधान निकाल्न सिन्धुपाल्चोक, नुवाकोट, धादिङ, रसुवा जस्ता उपत्यका नजिकका गाई पालक किसानहरुसँग समन्वय गरिरहेको उनको भनाई छ । खरेलले बुढानिलकण्ठ नगरपालिका मात्र नभएर काठमाडौँ उपत्यका कै अनियन्त्रित चौपाया व्यवस्थापनका लागि आफूले पहल गरेको जनाएका छन् ।

गाईवस्तु बीच सडकमा बसिदिएपछि सवारी चलाउन गाह्रो हुने चक्रपथ बुढानिलकण्ठ सडकखण्डका माइक्रो चालक खेमराज थापाले बताए । विगत नौ वर्षदेखि गाडि चलाउँदै आएका उनले पहिले यस्तो समस्या नभएको र पछिल्लो २÷४ वर्षमा सडकमा गाईवस्तुको संख्या ह्वात्तै बढेको बताउँछन् ।

यसबाट सवारी चालक, यात्री मात्र नभएर सडकछेउका व्यापारी पनि उतिकै पिडित छन् । बेच्नका लागि पसलबाहिर राखेको तरकारी यस्ता गाईवस्तु आएर खाईदिने गर्दा आफूहरु मर्कामा परेको बताउँछिन् तरकारी व्यापारी लक्ष्मि पण्डित । गाईवस्तुले सडक वरीपरी रोपिएका रुखका विरुवा पनि खाइदिने गरेका छन् ।

यसको तल्कालका लागि झाराटार्ने काम भन्दा दिर्घकालिन रुपमै यसको व्यवस्था कसरी गर्ने भनेर वैज्ञानिक निक्र्यौल निकाल्नुपर्ने देखिन्छ ।

-शिखरन्युजका लागि नविन पाैडेलकाे रिपाेर्ट