जनयुद्धकालमा जनसरकारका प्रमुख यसरी बन्न थाले ५ नम्बर प्रदेशको सभामुख

प्रदेश ५ को सभामुखमा उम्मेदवारी दिए पूर्ण घर्तीले, को हुन् पूर्ण ? नजिकबाट चिन्नुहोस्

काठमाडौं, १ फागुन । प्रदेश नं ५ को सभामुख पदका लागि नेकपा (माओवादी केन्द्र)का पूर्णबहादुर घर्तीले आज उम्मेदवारी दर्ता गराएका छन् । प्रदेशसभा संसद् सचिवालयमा आज बिहान १०ः३० बजे नेकपा (एमाले) र नेकपा (माओवादी केन्द्र) को संयुक्त उम्मेदवारको रुपमा घर्तीले सभामुख पदका लागि उम्मेदवारी दर्ता गराएका हुन् ।

माओवादी केन्द्र प्रदेश नं ५ का प्रमुख सचेतक दधिराम न्यौपानेको प्रस्ताव र एमाले प्रमुख सचेतक भूमिश्वर ढकालको समर्थनमा उम्मेदवारी दर्ता गराएका हुन् । रुकुम पूर्वबाट निर्वाचित घर्तीलाई प्रदेश नं ५ को सभामुखको उम्मेदवार बनाउने निर्णय माओवादी केन्द्र संसदीय दलको बैठकले दुई दिन अगाडि गरेको हो ।

५ नम्बर प्रदेशको संसदमा वाम गठबन्धनको बहुमत छ । ७८ सांसदमध्ये गठबन्धनसँग ६१ सांसद रहेका छन् । संसद्को तेस्रो शक्ति काँग्रेस र अरु दलले सभामुखमा उम्मेदवारी दिने तयारी गरेका छैनन् । वाम गठबन्धनबाट उम्मेदवारी दिएका घर्तीको सभामुखमा एकल उम्मेदवारी हुने र सर्वसम्मत निर्वाचित हुने अवस्था देखिएको छ ।

उम्मेदवारी दर्तापछि पत्रकारसँग कुरा गर्दै नेता घर्तीले प्रदेशसभालाई व्यवस्थित, मर्यादित र विवादरहित ढंगले सञ्चालन गरिने प्रतिक्रिया दिएका छन् । उनले प्रदेश नं ५ लाई समृद्ध बनाउन सबै दललाई एकैसाथ लिएर अघि बढ्ने बताए ।

को हुन् पूर्ण घर्ती ?
पूर्वी रुकुम प्रदेशसभा क्षेत्र नं. २ का नेकपा माओवादी केन्द्रको तर्फबाट विजयी पूर्णबहादुर घर्तीमगरको पारिवारिक तथा राजनीतिक पृष्ठभूमि ः
नाम : पूर्णबहादुर घर्तीमगर (आयाम)
ठेगाना : साविक चुनवाङ –६ लाखरपेदिचौर (भूमे गाउँपालिका वडा नं. ९ ) रुकुम
जन्ममिति : २०२४ असार २९ गते
बुवा : वीरबहादुर घर्ती
आमा : जयकली घर्ती
श्रीमति : सीता आचार्य
छोरी : लिचुन घर्ति मगर
दिदीहरु : आशिका बुढा र लालकुमारी घर्ती

राजनीतिक जीवन :
 २०३७ सालमा अनेरास्ववियुको सदस्यता प्राप्त
 २०४१ सालमा तत्कालीन मशालको पार्टी सदस्यता प्राप्त
 २०४६ सालमा अनेरास्ववियु रुकुमको जिल्ला अध्यक्ष एवं पूर्णकालीन सदस्य
 २०४८ सालमा नेकपा एकता केन्द्र जिल्ला उपसमिति रुकुमको पहिलो सम्मेलनबाट जिल्ला समितिमा निर्वाचित र एकता महाधिवेशन प्रतिनिधि
 २०४७ देखि २०५१ सम्म सिस्ने साँस्कृतिक समूह रुकुमको संयोजक
 २०५३ देखि २०५६ सम्म नेकपा माओवादी रुकुमको जिल्ला सेक्रेटरी
 २०५७ मा सम्पन्न दोस्रो राष्ट्रिय सम्मेलनबाट नेकपा माओवादीको केन्द्रीय सदस्य
 २०५७ देखि २०५८ सम्म म्याग्दी, बाग्लुङ र रुकुमको इन्चार्ज तथा केन्द्रीय सदस्य
 २०५७ मंसिर २९ गते जिल्ला जनसरकार रुकुमको प्रमुखमा निर्वाचित (पुस ७ मा घोषणा) तथा केन्द्रीय सदस्य
 २०५८ देखि २०५९ सम्म भेरी कर्णाली क्षेत्र अन्तर्गत डोल्पा, जाजरकोट र सुर्खेतको इन्चार्ज तथा केन्द्रीय सदस्य
 २०६० सालमा सामना साँस्कृतिक परिवारको संयोजक, केन्द्रीय श्रव्यदृश्य विभाग प्रमुख तथा नेकपा माओवादी केन्द्रीय सदस्य
 २०६२ देखि २०६४ सम्म नेकपा माओवादी रुकुम जिल्ला इन्चार्ज
 २०६४ सालमा नेपाल टेलिभिजनको अध्यक्ष
 २०६५ देखि २०६७ सम्म एनेकपा माओवादी मगरात राज्य सेक्रेटरी तथा केन्द्रीय सदस्य
 २०६८ देखि २०७० सम्म नेकपा क्रान्तिकारी माओवादीको थारुवान राज्य इन्चार्ज तथा केन्द्रीय सदस्य
 २०७१ देखि २०७२ सम्म नेकपा क्रान्तिकारी माओवादीको पश्चिम मगराज इन्चार्ज तथा पोलिटव्युरो सदस्य
 नेकपा माओवादी केन्द्र ५ नं. प्रदेश संयोजक तथा केन्द्रीय सचिवालय सदस्य

जेल जीवन :
पञ्चायत विरोधी आन्दोलनको क्रममा २०४५ पुस २७ गते रोल्पा लिवाङमा प्रहरीद्वारा गिरफ्तार भई चरम यातनाका साथ ५२ दिन हिरासत

अन्य :
 २०४७ देखि २०५२ सम्म केन्द्रीय साँस्कृतिक टोली सामनामा परिवारमा र जनसाँस्कृतिक संघको केन्द्रीय नेतृत्वमा रही विशेषतः राप्तीमा साँस्कृतिक अभियानको नेतृत्वदायी भूमिका निर्वाह ।
 तत्कालीन सरकारबाट रोल्पामा रोमियो अप्रेसनको क्रममा “ढल्दैन त्यो बन्दुकले ………….”, जनयुद्धको क्रममा “एकै रातमा धर्ति हल्लियो…………….”, “यात्रा हाम्रो लामो छ…………..” , “कस्ले भन्छ क्रान्ति यहाँ सफल हुँदैन………..” लगायत दर्जनौं चर्चित गीतसंगीतहरुको रचना र स्वरहरु रहेको ।