पत्रकारिता क्षेत्र वार्ता र संवादमा नगई आन्दोलनमै उत्रिएकोमा शिक्षामन्त्रीको गुनासो

काठमाडौं, २२ भदौ । नेपाल पत्रकार महासंघका लेखा समितिका संयोजक तथा थाहा सञ्चार नेटवर्कका समाचार प्रमुख रोशन पुरी कृष्णसेन इच्छुक प्रेस स्वतन्त्रता सेनानी सम्मान २०७४ बाट सम्मानित भएका छन् । प्रेस सेन्टर नेपाल ललितपुर र प्रेस चौतारी नेपाल ललितपुरले शुक्रबार संयुक्तरुपमा आयोजना गरेको सम्मान कार्यक्रममा शिक्षा विज्ञान तथा प्रविधि मन्त्री गिरिराजमणि पोख्रेलले नगद, दोसल्ला र सम्मानपत्रसहित सम्मान गरेका थिए ।

विगत १७ वर्षदेखि नेपालको जनपक्षीय पत्रकारिताको क्षेत्रमा महत्वपूर्ण योगदान गरेको भन्दै पत्रकार पुरीलाई प्रेस सेन्टरले सम्मान गरेको हो । प्रेस सेन्टर ललितपुरले हरेक वर्ष प्रदान गर्ने उक्त सम्मानअन्तरगत २०७५ का लागि भने महासंघ ललितपुरका अध्यक्ष ज्ञानप्रसाद पौडेललाई सम्मान गरियो । कार्यक्रममा मिलन नेपाली साहसिक पत्रकारिता पुरस्कार ०७४ बाट पत्रकार आस्था केसी र २०७५ बाट पत्रकार सागर न्यौपाने सम्मानित भएका छन् ।

कार्यक्रममा बोल्दै शिक्षा मन्त्री पोख्रे्रलले हालै कार्यान्वयनमा आएको मुलुकी संहिताका कतिपय त्रुटिहरु सच्याउन सरकार तयार रहेको बताए । पत्रकारिता क्षेत्रमा विकृति र विसंगति भित्रिने कुरामा सचेत हुनुपर्ने बताउँदै शिक्षा मन्त्री पोख्रेलले संहितामा भएका कमिकमजोरी सच्चाउन सरकार तयार रहेको बताए ।

पत्रकारिता क्षेत्र पनि वार्ता र संवादको प्रक्रियाबाट अगाडि बढ्नुपर्नेमा आन्दोलनमै उत्रिएकोमा मन्त्री पोख्रेलले गुनासो गरे । अभिव्यक्ति स्वतन्त्रता भन्नाले अरुको स्वतन्त्रता हनन् हुन नहुने भन्दै उनले कलम चलाउन बन्देज लगाउनेगरी कुनै पनि कानुन नहुने र भए पनि सच्चाउन सरकार प्रतिवद्ध रहेको बताए ।

कार्यक्रममा बेपत्ता पत्रकार नेपालीकी जीवनसंगिनी सबिता बस्नेतले आफ्ना श्रीमान खोजीका लागि सरकारसँग माग गरिन् । बेपत्ता भएको वर्षौंसम्म पनि आफ्ना पतिको अत्तोपत्तो नहुनु दुःखद भएको उनको भनाइ थियो ।