प्रदेश नम्बर १ मा प्रतिनिधि सभाका लागि २८ निर्वाचन क्षेत्र निर्धारण गरिएको छ । अहिलेसम्म सार्वजनिक भएको मतपरिणाममा कांग्रेसले एक स्थानमा मात्र विजय हाँसिल गरेको छ ।
कांग्रेसका लागि प्रदेश १ मा आशाको उज्यालो छर्ने डा.मिनेन्द्र रिजाल हुन् । उनले मोरङ २ बाट विजय हाँसिल गरेका छन् । रिजालले ३५ हजार ८ सय १९ मत ल्याएका छन् भने उनको प्रतिस्पर्धी वाम गठबन्धनका एमाले उम्मेदवार ऋषिकेश पोख्रेलले ३४ हजार १४ मत ल्याएका छन् । शुक्रबार दिउँसोबाट मतगणना सुरु हुँदा एमाले उम्मेदवार पोख्रेलले अग्रता लिएका थिए ।
मिनेन्द्र शनिबार बिहानसम्म पछाडी थिए तर उज्यालो हुन थालेपछि उनले अग्रता बढाएका थिए । उनी सो क्षेत्रबाट पहिलो पटक निर्वाचन लडेका हुन् । एमाले उम्मेदवार पोख्रेलले पूर्व सांसद हुन् । स्थानिय बासिन्दा पोख्रेलले २०७० को दोस्रो संविधानसभा निर्वाचनमा कांग्रेस उम्मेदवार आमोदप्रसाद उपाध्यायलाई पराजित गरेका थिए ।
३६ वर्षसम्म सो क्षेत्रमा कांग्रेसले निर्वाचन जित्दै आएको इतिहासलाई एमाले उम्मेदवार पोख्रेलले ०७० मा तोडेका थिए । तर, विजयको यात्रालाई निरन्तरता दिन सकेनन् । मोरङका ६ वटा प्रतिनिधिसभाको निर्वाचन मध्ये ५ वटामा कांग्रेसका हेवीवेट उम्मेदवार पराजित हुन पुगेपनि मिनेन्द्रले साख जोगाएका छन् ।
मिनेन्द्रको पहिलो जीत
मिनेन्द्र ०६४ देखि राजनीतिमा देखिएका हुन् । उनी पहिलो र दोस्रो निर्वाचनमा समानुपातिक सूचीमै बसेर मन्त्री भइसकेका छन् । तर, यसपटक देशभर एमाले र माओवादी केन्द्रले गठबन्धन बनाएर निर्वाचनमा सहभागीता जनाएपछि कांग्रेसले प्रभावशाली नेतालाई समानूपातिक सूचीबाट हटाएर निर्वाचनको मैदानमा खटाएको थियो ।
त्यसैक्रममा पहिलो पटक मिनेन्द्र निर्वाचन लड्न मोरङ २ पुगेका हुन् । उनी बिराटनगरका बासिन्दा हुन् । र, बिारटनगरबाट करिब ३४ किलोमिटर दक्षिणपूर्वी निर्वाचन क्षेत्रमा उनी पुगेका हुन् ।
प्रतिक्रिया