प्रदेश २ देशकै लाइफलाइन : महानिरीक्षक खनाल

काठमाडौं । गृह मन्त्रालयको वार्षिक कार्यक्रम अन्तर्गत प्रदेश २ मा सुरक्षा गोष्ठी धनुषाको जनकपुरमा शुक्रबारदेखि शुरू भएको छ । गोष्ठी आज सकिँदैछ । गृहमन्त्रीका सुरक्षा सल्लाहकार सुरक्षाविद् ईन्द्रजित राईको प्रमुख आतिथ्यमा शुरू भएको गोष्ठीमा प्रहरी महानिरीक्षक सर्वेन्द्र खनालले समुदाय(प्रहरी कार्यक्रम अभियानको रुपमा आएको बताए ।

राम्रो सन्देश दिन खोजेको चर्चा गर्दै सबै सरोकारवाला निकायसँग साझेदारी गर्दै यसलाई अझै सशक्त ढंगले अगाडि बढाउनुपर्ने बताए । शान्ति सुरक्षा र अपराध नियन्त्रणमा जनसाझेदारिता अभिबृद्धि गर्ने उद्देश्यकाले शुरू भएको कार्यक्रमको पृष्ठपोषण अत्यन्त उत्साहजनक रहेकोले साझेदारितालाई सफल पार्न सबैले राम्रोसँग काम गर्नुपर्ने बताए ।

सुशासन प्रवर्धन गर्नु सबैको दायित्व रहेकोले यसका लागि गृहमन्त्रालयको रणनीति र गृह प्रशासन सुधार योजनालाई कार्यान्वयन गर्ने क्रममा नेपाल प्रहरीले प्राथमिकताका आधार तय गरी प्रभावकारी ढंगले काम गर्दै आएको उल्लेख गरे ।

प्रदेश २ देशकै लाइफलाइनको रुपमा रहेकोले राजमार्ग बन्द जस्ता अवाञ्छित र गैरकानुनी क्रियाकलाप हुन नदिनेतर्फ तथा संगठित अपराध र चोरी तस्करी नियन्त्रणमा सबै सुरक्षा निकायको समन्वयकारी भूमिका हुनुपर्ने प्रहरी महानिरीक्षक खनालले चर्चा गरे ।

अवैध हातहतियार ओसारपसार जस्ता गतिविधि विरुद्ध कडा रुपमा प्रस्तुत हुनुपर्नेमा जोड दिए ।