प्रधानमन्त्रीको राजिनामा माग

काठमाडौं । आफ्ना माग पुरा नभएसम्म डा गोविन्द केसीले आमरण अनसन नतोड्ने भएका छन्। प्रमुख प्रतिपक्षी दल नेपाली कांग्रेसको नाराबाजीका बीच  प्रतिनिधिसभाले चिकित्सा शिक्षा विधेयक पास गरेपछि सत्तारुढ दलका नेताले माग सम्बोधन भएको भन्दै डा.केसीलाई अनसन स्थिगित गर्न आग्रह गरेका थिए।

डा. केसीले पत्रकार सम्मेलन गर्दै माग पुरा नहुँदा सम्म अनसन नतोड्ने बताएका हुन् । संसदले चिकित्सा शिक्षा विधेयक बहुमतले पास गरे लगतै पत्रकार सम्मेलन गरेका डा केसीले प्रधानमन्त्री नैतिकताबाट च्यूत भएको भन्दै राजीनामा माग गरेका हुन् ।

पत्रकार सम्मेलनमा १७ औं दिन देखि अनसनरत रहेका केसीको तर्फबाट क्षेत्रीले नै लिखित वक्तव्य पढेका थिए । आफूसँग भएको सहमति विपरित विधेयक पास भएको भन्दै डा। केसीको विज्ञप्तिमा यो जनतामाथि नै धोका भएको उल्लेख नरिएको छ ।

आज कांग्रेस सांसदहरुले नाराबाजी गरिरहेका बेला सभामुख कृष्णबहादुर महराले शिक्षामन्त्री गिरिराजमणि पोखरेललाई विधेयक पेश गर्न अनुमति दिएका थिए । कांग्रेस सांसदहरुले पोखरेललाई रोक्न खोजे पनि मर्यादापालकले रोष्टममा पुर्‍याएका थिए । प्रतिपक्षी दल नेपाली काँग्रेसका नेताहरुले अब सडक र सदनबाट आन्दोलन चर्काउने बताएका छन् ।