मुख्यमन्त्री छान्न आज निर्वाचनः अन्तिममा पाण्डे आउट

काठमाडौं, माघ २६ । प्रदेशसभामा बहुमत ल्याएको नेकपा एमालेले ३ नम्बर प्रदेशमा कसलाई मुख्यमन्त्री बनाउने निर्णय नहुँदै विवाद सुरु भएको छ । मुख्यतः पार्टी उपाध्यक्ष अष्टलक्ष्मी शाक्य र धादिङबाट निर्वाचित राजेन्द्र पाण्डेबीच मुख्यमन्त्रीको लागि विवाद सुरु भएको थियो ।

प्रदेश ३ को मुख्यमन्त्रीको लागि शाक्य र पाण्डेसँगै डोरमणि पौडेल, पशुपति चौलागाईं, रामेश्वर फुयाँल र केशव स्थापितको नाम पनि चर्चामा थियो । संसदीय दलको नेता नै मुख्यमन्त्री बन्ने भएकाले आकांक्षीहरु धेरै देखिएका हुन् ।

तर, पौडेल, स्थापित र फुयाँलबाहेक अन्य सबै एमाले वरिष्ठ नेता माधव नेपाल निकट हुन् । स्रोतका अनुसार एमाले अध्यक्ष केपी ओलीले राजेन्द्र पाण्डेलाई मुख्यमन्त्री बन्ने हो भने चितवन १ बाट निर्वाचित सांसद सुरेन्द्र पाण्डेलाई समेत आफ्नो गुटमा ल्याउन आग्रह गरेका थिए ।

राजेन्द्र पाण्डे सुरेन्द्र पाण्डेका दाई समेत हुन् ।

शाक्य र पौडेल भीड्दै
विवादका बाबजुद आज प्रदेश ३ को संसदीय दलको नेता चयनका लागि एमालेले मनोनयन प्रक्रिया सुरु भएको छ । आकांक्षीहरु धेरै भएपछि एमालेले निर्वाचनमार्फत दलको नेता चुन्न लागेको थियो ।
शुक्रबार बिहान १० बजेसम्म दुई जनाको उम्मेदवारी दर्ता भइसकेको छ । पहिलो नम्बरमा अष्टलक्ष्मी शाक्य र दोस्रोमा डोरमणी पोडेलेको उम्मेदवारी दर्ता भएको छ ।

ललितपुरको च्यासलस्थित तुलसीलाल स्मृति भवनमा जारी रहेको नेता छान्न लागि भएको चुनावमा शाक्य र पौडेलको उम्मेदवार परेको हो । पाँच जना सदस्यले मनोयन लगेपनि निर्धारित समय बिहान १० बजेसम्म शाक्य र पौडेलको मात्रै उम्मेदवार परेको हो ।

प्रदेश ३ को संसदीय दलको नेता चुन्नको लागि उपाध्यक्ष शाक्य र पौडेलबीच चुनाव हुने भएको छ । यसअघि एमालेको ३ नम्बर प्रदेश सचिवालयले शाक्यलाई मुख्यमन्त्री बनाउने निर्णय गरेको थियो ।

गोप्य मतदान हुने
दिउँसो १२ बजेदेखि १ बजेसम्म संसदीय नलको नेता छान्नका लागि गोप्य मतदान हुनेछ । राजेन्द्र पाण्डे, रामेश्वर फुँयाल र गणेश दुलालले उम्मेदवारकी मनोयन पत्र लगेपनि शाक्य र पौडेलले मात्रै मनोनयन दर्ता गरेका थिए ।

एमालेको प्रदेश नम्बर तीन पार्टी कमिटीको संयोजक समेत रहेकी शाक्य माधव नेपाल निकट नेता हुन भने हेटौडा नगरपालिका पूर्वमेयर पौडेल अध्यक्ष केपी शर्मा ओली निकट नेता हुन् ।

एमाले संसदीय दलको नेता नै प्रदेश नम्बर तीनको मुख्यमन्त्री हुनेछ । १ सय १० सदस्यीय प्रदेशसभामा एमालेका ५८ सदस्य रहेका छन् ।

अन्तिममा पाण्डे ‘आउट’
एमालेका पोलिटब्यूरो सदस्य रोजेन्द्र पाण्डेले आफूलाई अध्यक्ष केपी ओलीको समर्थन रहेको खुलासा समेत गरेका थिए । तर, उनै पाण्डे अन्तिम समयमा आएर उम्मेदवारी दर्ता गर्नबाट बञ्चित भएका छन् ।

स्रोतका अनुसार मुख्यमन्त्री बन्ने भएपछि राजेन्द्र पाण्डे लगभग ओली गुटमा जान लागेका थिए । ओली गुटमा गएपछि लगभग पाण्डे मुख्यमन्त्री बन्ने सम्भावना रहेको थियो ।

सहमति नजुटेपछि प्रदेश १ को संसदीय दलको नेता पनि एमालेले निर्वाचनमार्फत् नै चयन गर्दैछ ।