रोल्पाली दिलबहादुरलाई साउदी अदालतले तोक्यो झण्डै ६३ लाख ब्लडमनि

बाबुलाल बुढा

रियाद (साउदी), ८ बैशाख । रोल्पा नगरपालिका– १० साविक धवाङ– ५ पेवाकी मनिका बुढा दुई नाबालक छोराछोरीलाई घरमै छोडेर राजधानी काठमाडौंमा भौंतारिइरहेकी छन् । श्रीमान् दिलबहादुर घर्तीलाई साउदी अदालतले करीव ६३ लाख ब्लडमनि तिराउने फैसला गरेपछि ब्लडमनि जुटाउने र श्रीमान्लाई जेलमुक्त बनाएर स्वदेश फर्काउने सपना बोकेर उनी सहयोगको आशामा विभिन्न निकाय र व्यक्तिसँग हारगुहार गरिरहेकी छन् ।

रोल्पा नगरपालिका– १० का ३० वर्षीय दिलबहादुर घर्ती परिवारको न्यून आर्थिक अवस्थाको कारण रोजगारीको लागि साउदी अरब पुगेका थिए । उनी २०७२ माघ १८ मा साउदी अरबको रियादस्थित एक कम्पनी (Majid Al Diabahi Contraction & Est.Riyad) मा पुगेका थिए । उक्त कम्पनीमा नेपालबाट स्काभेटर अपरेटरमा गए पनि त्यहाँ कम्पनीले मालबाहक ट्रक थमाइदियो । र, दिलबहादुर घर्ती ट्रक चलाउन बाध्य भए ।

रियादको दोआद्मी भन्ने ठाउँमा कार्यरत रहँदा सवारी चलाउने क्रममा बाटोमा साउदी नागरिक (Oteeq bin Dgafa dk Doghaleed) लाई गाडीले ठक्कर दिएको थियो । ठक्करबाट साउदी नागरिकको ज्यान गएपछि दिलबहादुर घर्ती २०७३ जेठ ३० गते जेल गएका थिए । अदालतले दिलबहादुरको ७५५ गल्ती देखाई उनलाई २ लाख २५ हजार रियाल क्षतिपूर्ति तिराउने त्यहाँको अदालतले फैसला गरेको थियो ।

मृतक परिवारलाई २ लाख २५ हजार रियाल क्षतिपूर्ति दिनुपर्ने फैसलाको निर्णयप्रति दिलबहादुरको पक्षमा नेपाली दूतावासले अदालतमा पुनरावेदन गरेको थियो । पीडित परिवारलाई मिनाहाको लागि पटकपटक आग्रह गर्दा पनि उनीहरु निर्णयप्रति नरम नबन्दा अदालतले पुनः पहिलेकै फैसलालाई सदर गरेको हो ।

नेपाली रुपैयाँ करीव ६३ लाख ब्लडमनि तिर्नुपर्ने भएपछि दिलबहादुरकी श्रीमती मनिका र उनको परिवारले आफन्त लगायत देशविदेशमा रहने सबै नेपालीसँग सहयोगको लागि आग्रह गरेको छ । श्रीमान दिलबहादुर घर्तीको रिहाइका लागि श्रीमती मनिका बुढाले करीव ६३ लाख नेपाली रुपैयाँ जुटाउने दौडधुपमा लागेकी हुन् ।

एक वर्षअघि नै उनी रकम संकलनमा लागेकी थिइन् । त्यसबेला साउदीस्थित नेपाली दूतावासले अदालतको फैसला पर्खिनु पर्ने जानकारी दिएपछि उनी रोकिएकी थिइन् । उनी अहिले ८ वर्षीया छोरी नमुना घर्ती र ४ वर्षीय छोरा सायन्स घर्तीलाई घरमै छोडेर रोल्पाबाट काठमाडौ पुगेकी छन् । दिलबहादुर घर्तीको रिहाइका लागि सहयोग गर्न चाहने महानुभावहरुले तलको बैंक खातामा रकम जम्मा गरी जानकारी समेत दिन मनिकाले सबैमा आग्रह गरेकी छन् ।

नेपाल राष्ट्रिय वाणिज्य बैंकमा खोलिएको सामूहिक खाता नं.
११९००२६७४६१०

ब्यक्तिगत खाता नं. : 119002661810

मनिका बुढा
मोबाइल : ९८४४९६९५४९