सरकार प्रदेश र संघको चुनाव हुन नदिने षडयन्त्र गर्दैछः अध्यक्ष ओली

काठमाडौं । एमाले अध्यक्ष केपी शर्मा ओलीले प्रदेश र संघीय संसदको चुनाव नगराउने षडयन्त्र भइरहेको बताउनुभएको छ । राजधानीमा आयोजित कार्यक्रममा बोल्दै अध्यक्ष ओलीले सोमबार प्रमुख दलका नेताहरुको बैठकमा सत्तारुढ दलहरुले पहिले नै सहमति भइसकेको मतपत्र सम्बन्धी बखेडा झिकेर चुनाव टार्ने प्रपञ्च गरेको खुलासा गरेका छन् ।

‘हामीले तानेर ६ महिनासम्म लगाएर बल्ल स्थानीय तहको निर्वाचनमा यो सरकारलाई ल्यायौं, यो अपराधिक गठबन्धनले अव प्रादेशिक र संघीय संसदको चुनाव नगर्ने षडयन्त्र थालेको छ । हिजो दलीय बैठकमा पहिले नै सहमति भइसकेको मतपत्रका विषयमा बखेडा झिकेर त्यसको संकेत गरेका छन्,’ ओलीले भन्नुभयो ।

सोमबार प्रमुख दलका शीर्ष नेताहरुको बैठकमा कांग्रेस सभापति तथा प्रधानमन्त्री शेरबहादुर देउवाले समानुपातिक र प्रत्यक्ष निर्वाचनका लागि निर्वाचन आयोगले गरेको तयारी विपरीत अलग अलग मतपत्र प्रयोग गर्नुपर्ने अडान राख्नुभएको थियो । पहिले दलहरुसँगको सहमतिमा आयोगले तय गरेको ब्यवस्थाविरुद्ध प्रधानमन्त्री देउवाले आपत्ति जनाएका हुन् । ओलीले देउवाको यस्तो ढिपीलाई चुनाव नगराउने षडयन्त्रका रुपमा लिनुभएको छ ।

कतिवटा मतपत्र भन्ने पहिले नै सहमति भइसकेको थियो । तर अहिले मतपत्र भएन भनेर बखेडा झिक्ने काम सरकारले गरेको ओलीको भनाइ छ । संविधान कार्यान्वयनका २ बर्ष बिषयक गोष्ठीमा अध्यक्ष ओलीले आयल निगमको अनियमिततामा भरियालाई कारवाही गरेर भारी बोकाउनेलाई जोगाउन खोजेको आरोप लगाउनुभयो ।