स्वदेशी कृषि उत्पादनको बजार सुनिश्चित गर्न सरकारको यस्तो निर्णय

सरकारले स्वदेशी कृषि उत्पादनको बजार सुनिश्चित गर्न नेपाल बाहिरबाट ल्याइने तरकारी तथा फलफूलको अग्रिम आयकर बृद्धि गरेको छ । सरकारले बाहिरबाट ल्याइने तरकारी तथा फलफूलमा ४ प्रतिशतले कर बृद्धि गरेको छ । ५ प्रतिशतमात्रै लाग्दै आएको कर हिजो जारी बजेटमार्फत् ९ प्रतिशत पुर्याइएको हो । भारत र चीन बाहेक अन्य तेस्रो मुलुकबाट आयात गरिने आलुमा पनि कर १० प्रतिशतबाट बढाएर १५ प्रतिशत बनाइएको छ ।

यसरी गरिएको कर बृद्धिले विदेशबाट आयात हुने तरकारी तथा फलफूलको मुल्य बढ्न जाने हुँदा स्वदेशी कृषि उत्पादनको बजार सुनिश्चित हुन सक्ने भएको छ । करवृद्धिले विदेशी आयात निरुत्साहित गर्न सकिने कृषि तथा पशुपन्छि विकास मन्त्रालयले जनाएको छ । भारतीय तरकारीले बजार ओगट्ने तर स्वदेशी तरकारी नबिक्ने अवस्थाको अन्त्य गर्न यस्तो व्यवस्था गरिएको जनाएको छ । आर्थिक ऐनमा भएको व्यवस्था अनुसार बढेको करको कार्यान्वयन शुक्रबारदेखि नै गरिएको छ ।

त्यसैगरी कृषि फार्मलाई चाहिने विभिन्न सामाग्रीहरुमा लगाइदै आएको भन्सार शुल्क पनि घटाइएको छ । जसमध्ये स्प्रे मेसिन, सिँचाईका सामाग्री तथा तरकारी र फलफूलको बीउ, प्लासिक सिटमा लिइदै आएको १० प्रतिशत भन्सार शुल्क १ प्रतिशत बनाइएको छ । लघु र घरेलु उद्योगले ल्याउने मेसिनिरी सामाग्रीको पनि २ प्रतिशत मात्रै भन्सार लाग्ने व्यवस्था कायम गरिएको छ ।