साढे ३३ किलो सुन काण्डका मुख्य नाइके पन्त पक्राउ

काठमाडौं । प्रहरीले साढे ३३ किलो सुन काण्डका मुख्य नाइके राजनप्रसाद पन्तलाई पक्राउ गरेको छ । पन्त नेपाल आउन लागेको अवस्थामा आबुधाबी प्रहरीले विमानस्थलबाटै पक्राउ गरेको हो ।

उनलाई सोमबार बिहान काठमाडौं ल्याइएको छ । नेपाल प्रहरीले पन्तलाई दुबई प्रहरीको सहयोगमा पक्राउ गर्न सफल भएको हो । एसपी किरण बज्राचार्यले पक्राउ परेका पन्तलाई केन्द्रीय अनुसन्धान ब्युरो (सीआईबी)मा बुझाइने बताइन् ।

प्रहरीले गत २१ पुसमा त्रिभुवन अन्तर्राष्ट्रिय विमानस्थलबाट ३३ किलो सुन बरामद गरेको थियो । सुन लिएर आएका गोपालबहादुर शाहीको साथबाट सीआईबीले ३३ किलो सुन समातेको थियो ।

बरामद गरिएको सुनको बजार मूल्य १५ करोड रुपैयाँभन्दा धेरै थियो । सुन लिएर आउने शाही र सुन लिन विमानस्थल पुगेका दुई जना दिलबहादुर थापा र सन्तोष काफ्ले पनि पक्राउ परेका थिए ।