विकासमा एक भएर काम गर्ने तेह्रथुमबाट जित्ने र हार्ने नेताको प्रतिबद्धता
सारांश
- तेह्रथुम, पुस १ – तेह्रथुममा चुनाव जित्ने र हार्ने सबै नेताले जिल्लाको विकासमा मिलेर काम गर्न प्रतिबद्ध रहेको बताएका छन् ।
- प्रतिनिधिसभा चुनावमा जिल्लाबाट दोश्रोपटक विजयी हुनुभएका एमाले नेता भवानीप्रसाद खापुङले विजय उत्सवलाई सम्बोधन गर्दै ‘अहिलेसम्म संक्रमणकाल थियो, अब वाम गठबन्धनको स्थायी सरकार बन्छ, आर्थिक समृद्धि र विकासको लहर सुरु हुन्छ ।
- ’ विजयी नेता खापुङले यसअघि संविधान सभाको सदस्य हुँदा अधिक समय संविधान निर्माणमा बितेको र अब विकासका काममा ध्यान लगाउने बताउनुभयो ।
तेह्रथुम, पुस १ – तेह्रथुममा चुनाव जित्ने र हार्ने सबै नेताले जिल्लाको विकासमा मिलेर काम गर्न प्रतिबद्ध रहेको बताएका छन् । प्रतिनिधिसभा चुनावमा जिल्लाबाट दोश्रोपटक विजयी हुनुभएका एमाले नेता भवानीप्रसाद खापुङले विजय उत्सवलाई सम्बोधन गर्दै ‘अहिलेसम्म संक्रमणकाल थियो, अब वाम गठबन्धनको स्थायी सरकार बन्छ, आर्थिक समृद्धि र विकासको लहर सुरु हुन्छ ।’ विजयी नेता खापुङले यसअघि संविधान सभाको सदस्य हुँदा अधिक समय संविधान निर्माणमा बितेको र अब विकासका काममा ध्यान लगाउने बताउनुभयो ।
पहिलो संविभानसभा चुनाव २०६४ सालमा कांग्रेसका तुलसी सुब्बासँग पराजित खापुङ २०७० सालको दोस्रो संविधानसभा चुनावमा सुब्बालाई नै पराजित गरी सभासद हुनुभयो । दोश्रो पटक जिल्लाबाट निर्वाचित खापुङले अब सडक निर्माण, सिंचाई, खानेपानी लगायत पुर्वाधार विकास प्राथमिकतामा राख्ने बताउनुभयो ।
कोणसभामा नेकपा एमालेका विजयी नेताहरुले जिल्लालाई नमुना बनाउन भूमिका खेल्ने बताए । प्रदेशसभा (क) बाट विजयी नेकपा एमाले जिल्ला अध्यक्ष लक्ष्मण तिवारीले जिल्लालाई प्रदेश नम्बर १ कै उत्कृष्ट पर्यटकीय गन्तव्य बनाउने बताउनुभयो । त्यस्तै प्रदेशसभा (ख) बाट निर्वाचित एमाले नेता तेजमान कन्दङवाले आफ्नो क्षेत्रलाई भ्रष्टाचारमुक्त बनाउने घोषणा गर्नुभयो ।
चुनाव जितेका उम्मेदवारले विजय उत्सवमा विकास र समृद्धिका प्रतिवद्धता जनाउँदै गर्दा चुनाव हारेका कांग्रेस उम्मेदवारले पत्रकार सम्मेलन गर्दै अबका पाँच वर्ष नागरिक काम गर्ने बताउँनुभयो । पत्रकार सम्मेलनमा बोल्दै भौतिक पूर्वाधार तथा राज्यमन्त्री समेत रहनुभएकी कांग्रेस नेतृ सीता गुरुङले भन्नुभयो, ‘विकासका हिसाबले जिल्ला धेरै पछाडि छ, त्यसका निम्ती सबैले राजनीति भन्दा माथि उठ्न सक्नुपर्छ ।’
प्रतिक्रिया