ओली-प्रचण्डबीच यस्ताे छ आशंका

काठमाडौं, पुस १२ । ‘भेटेनन् ओली-दाहाल, खटपटको आशंका’ शीर्षकमा अाजकाे अन्नपूर्ण पोष्ट दैनिकले समाचार छापेको छ । वाम गठबन्धनका दुई शीर्ष नेता एक-अर्काको भूमिकाप्रति आशंका गर्न थालेका र एमाले अध्यक्ष केपी ओली र माओवादी अध्यक्ष पुष्पकमल दाहाल ‘प्रचण्ड’बीच केही दिनयता प्रत्यक्ष भेटघाटसहितको संवाद हुन नसक्दा आशंका र अविश्वास जन्मिएको समाचारमा उल्लेख छ ।

समाचारमा लेखिएको छ- गठबन्धन निर्माणकै बेला प्रस्ट चित्र नआइसकेकाले पार्टी एकतापछिको नेतृत्व व्यवस्थापनमा विभिन्न अड्कलवाजी हुँदै आएका थिए । सरकारको नेतृत्व, पार्टी नेतृत्व, आलोपालो सरकारलगायत चर्चा चलेका थिए ।

दुवै नेताले आफूहरूका लागि व्यक्तिगत पद/प्रतिष्ठा पार्टी एकताभन्दा ठूलो हुन नसक्ने बताउँदै आइरहेका थिए । २९ मंसिरमा बबरमहलको एक निजी निवासमा भएको छलफलबाहेक पार्टी एकताका विषयमा दुई पार्टीका शीर्ष नेताबीच प्रत्यक्ष संवाद हुन नसकेपछि अविश्वास चुलिएको छ ।