‘दरबारमार्ग रेप केस’ : अभियुक्तहरु नै डिएसपीकै साथी !

काठमाडौं, माघ २४ । काठमाडौंको दरबारमार्गस्थित होटल ल्याण्डमार्कमा भएको सामूहिक बलात्कार घटनाका अभियुक्तहरु डिएसपी तिलक भारतीकै साथी भएको खुलेको छ ।

घटनाका मुख्य नाइके विकास गौतम र दीपक श्रेष्ठ महानगरीय प्रहरी वृत्त दरबारमार्गका तत्कालीन इन्चार्ज डिएसपी भारतीको पुरानो साथी भएको अनुसन्धानमा खुलेको छ ।

आफ्नो पुरानो साथी भएकै कारण बलात्कार जस्तो गम्भीर घटनामा मिलापत्र गराउन डिएसपी भारतीले भूमिका खेलेका थिए । सोही प्रकरणमा उनीमाथि छानबिन भइरहेको छ ।

अभियुक्तहरु गौतम र श्रेष्ठसँग डिएसपी भारतीसँग फेसबुकमा पनि साथी छन् । स्रोतका अनुसार डिएसपी भारतीलाई दरबारमार्ग वृत्तमा ल्याउन सहयोग गर्ने डेजाभु डिस्कोका एक सञ्चालकको मध्यस्थतामा उक्त बलात्कार प्रकरणमा मिलापत्र भएको थियो ।

अभियुक्त गौतम राप्रपाका नेता बिक्रम पाण्डेका निकट व्यक्ति हुन् भने श्रेष्ठ सञ्चारमन्त्री मोहन बस्नेतसँग राम्रो सम्बन्ध भएका व्यक्ति हुन् । श्रेष्ठ तरुण दल सिन्धुपाल्चोकमा समेत आबद्ध व्यक्ति हुन् । दुवै जनाको डिएसपी भारतीसँग पहिलेदेखि नै दोस्ती थियो ।

गत माघ ७ गते राति ल्याण्डमार्क होटलको ४०५ नम्बर कोठामा चार जना युवकले एक २० वर्षीया युवतीलाई सामूहिक बलात्कार गरेका थिए । आफ्ना प्रेमी शैलेस कार्कीसँग होटलमा बस्न गएकी ती किशोरीमाथि कार्कीकै सहयोगमा अन्य ३ जनाले बलात्कार गरेका थिए ।

घटनापछि होटलबाट निस्किएकी युवतीले प्रहरीमा उजुरी गरेकी थिइन् । प्रहरीले चारै जनालाई पक्राउ गरेर एक रात थुनेपछि भोलिपल्ट मिलापत्र गराएर छाडिदिएको थियो । पछि घटना मिडियामा गएपछि छानबिन थालिएको हो । जस क्रममा दरबारमार्ग वृत्तका इन्सपेक्टर लक्ष्मणसिंह ठकुरी र सई चन्द्र भण्डारी निलम्बनमा परिसकेका छन् । घटनामा डिएसपी भारतीको प्रत्यक्ष संलग्नता भए पनि निलम्बन हुनबाट जोगिन अनेक उपायहरु रच्न थालेका छन् ।