यी हुन १० सर्वाधिक रुचाइएका फुटबलरहरु, पहिलाे नंबरमा रोनाल्डो कि मेस्सी ?

विश्लेषकहरुले समर्थकहरु अब मेस्सी र रोनाल्डोलाई छाड्दै युवा स्टार एमबाप्पे लगायतका खेलाडीतिर आकर्षित हुने बताउन थालेका थिए। तर, विश्वस्तरीय खेल समाचार संस्था इएसपिएनले गरेको एक सर्वेक्षणले त्यस विश्लेषणलाई गलत सावित गरिदिएको छ। इएसपिएनले विश्वभरबाट भोटिङमार्फत् तथ्यांक संकलन गर्दा १० सर्वाधिक रुचाइएका फुटबलरहरुको सूचिको पहिलो र दोस्रो स्थानमा क्रमशः रोनाल्डो र मेस्सी परेका हुन्।

यसैगरी तेस्रोमा फ्रान्स तथा पिएसजीका केलियन एमबाप्पे, चौथोमा क्रोएसिया तथा रियल मड्रिडका लुका मोड्रच, पाँचौमा बेज्लियम तथा चेल्सीका इदेन ह्याजार्ड, छैठौंमा फ्रान्स तथा एथ्लेटिको मड्रिडका एन्टोनी ग्रीजम्यान, सातौमा इंगल्याण्ड तथा टोटेनह्यामा ह्यारी केन, आठौंमा ब्राजिल तथा पिएसजीका नेमार, नवौंमा बेल्जियम तथा म्यानचेस्टर सिटीका केभिन डि ब्रुन र दशौंमा फ्रान्स तथा म्यान यूका पल पोग्बा सर्वाधिक रुचाइएका खेलाडीको सूचिमा छन्।

इएसपिएनले अन्य खेलाडीहरुको विश्वकप प्रदर्शनले समर्थकहरुमा प्रभाव पारेपनि रोनाल्डो र मेस्सीमा त्यस प्रभाव नदेखिएको बताएको छ । रोनाल्डो र मेस्सी दुवै एक दशक यताका स्टार फुटबलरहरु हुन् । दुवैले लगातार दशपटक बलुन डि ओर अवार्ड हातपार्दा अन्य कुनै खेलाडीले यस अवार्ड जित्न सकेको छैन। दुवैको पाँच–पाँच वटा बलुन डि ओर अवार्ड छ। फुटबलमा पाउनुपर्ने सबै किसिमका उपाधि हात पारेका रोनाल्डो र मेस्सी विश्वकप उपाधि जित्नबाट भने वञ्चित छन्।

यस सिजन रोनाल्डो रियल मड्रिडबाट इटालियन क्लव युभेन्ट्स अनुबन्ध भएका छन्। तर मेस्सी आफ्नो वाल्यकालदेखिको क्लव बार्सिलोनामै छन्।