सहकारीलाई कृषिमा केन्द्रीत हुन प्रधानमन्त्री ओलीको आग्रह

काठमाडौं । प्रधानमन्त्री केपी शर्मा ओलीले सहकारीहरुलाई आफ्ना गतिविधि कृषिमा केन्द्रीत गर्न आग्रह गर्नुभएको छ । राष्ट्रिय सहकारी महासंघको प्रतिनिधि मण्डलसँगको भेटमा प्रधानमन्त्री ओलीले कृषिमा देशको करिब दुई तिहाइ जनसंख्या निर्भर भएकोले आधुनिकीकरण नगरी देशमा समृद्धि हासिल नहुने बताउनुभएको छ ।

“सहकारीले कृषिमा आधुनिकीकरणका लागि खेती प्रणालीलाई ठूलाठूला प्लटमा लैजानुपर्छ” प्रधानमन्त्री ओलीले भन्नुभयो “कृषिमा यान्त्रिकीकरण र प्रविधिको प्रयोगबाट उत्पादन र उत्पादकत्व दुवै बढाउन सकिन्छ । यो कुरा सहकारीको प्राथमिकतामा हुनुपर्दछ ।”

प्रधानमन्त्री ओलीले सहकारीहरु ऋण तथा बचतमा मात्र केन्द्रीत हुुन नुहने बताउनुभएको छ । “सहकारीहरुले उपभोग्यवस्तु, निर्यातजन्य वस्तुको उत्पादनमा जोड दिनु पर्दछ” प्रधानमन्त्री ओलीले भन्नुभयो ।

किसानलाई आधुनिक खेतीतर्फ प्रोत्साहनका लागि सहकारीले सस्तो ब्याजमा ऋण उपलब्ध गराउनुपर्ने र त्यसका लागि सरकारले सहकारीहरुलाई सहयोग गर्ने प्रधानमन्त्री ओलीको भनाइ छ । “वर्तमान सरकार सहकारी मैत्री छ । सहकारीले भोगेको कानुनी अप्ठ्यारालाई हल गर्न सरकार तयार छ” प्रधानमन्त्री ओलीले भन्नुभयो “कुन ऐनले कहाँ अप्ठेरो पारेको छ, लेखेर ल्याउनुहोस । त्यसलाई सम्बोधन गर्न सरकार तयार छ ।”

सरकारले लागु गरेको प्रधानमन्त्री कृषि आधुनिकीकरण परियोजना सफल पार्न सहकारीहरुको ठूलो भूमिका हुने प्रधानमन्त्री ओलीको भनाइ छ । प्रधानमन्त्री ओलीले परियोजना मार्फत १ हजार हेक्टर भन्दा बढी क्षेत्रफलमा गरिने खेतीलाई सुपर जोन र ५ सय हेक्टर भन्दा बढी क्षेत्रफलमा गरिने खेतीलाई जोनको रुपमा विकास गरिएको बताउनुभयो । प्रधानमन्त्री ओलीले भन्नुभयो “चक्लाबन्दी भएको जग्गालाई भाडामा लिएर एउटै प्लट बनाएर ठुलो मात्रामा खेती गर्ने काम सहकारीहरुले गर्नुपर्दछ ।”