अध्यक्ष ओलीको अभिव्यक्तिप्रति उपमहासचिव योगेश भट्टराईको असन्तुष्टि: ‘जितको ग्यारेन्टी कसैले लिएको हुँदैन’

नेकपा एमालेका उपमहासचिव योगेशकुमार भट्टराईले पार्टी अध्यक्ष केपी शर्मा ओलीले आफू र अन्य नेताहरूबारे दिएको पछिल्लो अभिव्यक्तिप्रति कडा असन्तुष्टि र रोष प्रकट गरेका छन्। बिहीबारको कान्तिपुर दैनिकमा प्रकाशित अन्तर्वार्तामा अध्यक्ष ओलीले सुरेन्द्र पाण्डे र योगेश भट्टराईले यस पटक जित्ने स्थिति नरहेको तथा बिन्दा पाण्डेको कुनै आधार नभएको भनी टिप्पणी गरेपछि भट्टराईले शुक्रबार फेसबुकमार्फत आफ्नो धारणा सार्वजनिक गरेका हुन्। ओलीले सोही अन्तर्वार्तामा गोकुल बाँस्कोटाले कार्यकर्ता पंक्तिमा विभाजन ल्याउँदा अप्ठ्यारो स्थिति सिर्जना भएको समेत बताएका थिए।

अध्यक्षको यस्तो अभिव्यक्तिबाट आफू चिन्तित र दुःखी भएको उल्लेख गर्दै भट्टराईले चुनावमा कसैले पनि जितको ग्यारेन्टीसहित लिखित कागज गरेर टिकट नलिएको भन्दै ओलीलाई जवाफ दिएका छन्। आफ्नो मुख्य मिसन सूर्य चिह्न र नेकपा एमालेलाई जिताउनु नै रहेको स्पष्ट पार्दै उनले आफू कुनै पनि हालतमा विचलित वा निरास नभएको बताएका छन्। अहिलेको समयमा पार्टीका आन्तरिक विषयमा सार्वजनिक बहस गर्नु उचित नहुने भन्दै उनले फागुन २१ गतेको चुनावसम्म आफू संयमित रहने संकेत गरेका छन्।

भट्टराईले अहिले धेरै प्रतिक्रिया नदिने तर फागुन २१ को चुनाव सकिएपछि यी विषयहरूमा कुरा उठाउने उल्लेख गरेका छन्। पार्टीभित्रको आन्तरिक कलह र नेतृत्वको विवादास्पद टिप्पणीले कार्यकर्ता पंक्तिमा अन्योल सिर्जना गरिरहेका बेला भट्टराईको यो भनाइले एमालेभित्रको आन्तरिक शक्ति सन्तुलनमा नयाँ बहस छेडिदिएको छ।