खाने तेलमा मुल्यवृद्धि : लिटर मै बढ्यो २० रुपैया

काठमाडौं । सरकारले मूल्यवृद्धि नियन्त्रण गर्ने बताइरहँदा बजारमा दैनिक उपभोग्य वस्तुको भाउ बृद्धि भएको छ । खाद्य वस्तु लगायत दैनिक उपभोग्य बस्तुको बजार भाउ छोई नसक्नु छ । झनै खाने तेलमा अहिले विना कारण लिटर मै विस रुपैया सम्म भाउ बढाईएको छ । खानेतेलमा उपभोक्ता व्यापक मात्रामा ठगिने गरेको छ ।

खाने तेल उत्पादकहरूदेखि बजारका खुद्रा व्यापारीहरू सम्मले मनपरी मुल्य लिने गरेको पाइएको छ । अहिले खाने तेलमा लिटर मै दश देखि विस रुपैंया सम्म भाउ बढाइएको छ । खाने तेलको परिणाम, गुणस्तर र मुल्यमा समेत व्यापारीले ठगि गर्ने गरेको छ । खानेतेलमा झण्डै ३३ देखि सतप्रतिशतसम्म मूल्यवृद्धि गरेको छ । एक्कासी तेलमा मूल्य वृद्धि भए पछि उपभोक्ता मंहगीको मारमा परेका छन् ।

सामान्य रुपमा बजार भाउ अनुसार नै तेल खरिद गर्दै आएका उपभोक्ताहरु एक्कासी लिटर मै झण्डै २५ देखि ३० प्रतिशत सम्म मुल्य वृद्धि भए पछि अचम्ममा परेका छन् । उनीहरु भन्छन् न अहिले नाकावन्दी न तेल अभाव । तर मूल्य वृद्धि भईरहेको छ । तेलका मुल्य वृद्धिले आफुहरुको भान्सा नै मंहगिएको गृहिणीहरु बताउंछन् ।

नेपालमा एक जना व्यक्तिले वार्षिक कति तेल उपभोग गर्छ भन्ने विषयमा आधिकारिक रुपमा कुनैपनि संस्थाले यकीन गर्न सकेको भेटिएन । तर, विश्वमा वार्षिक २४ किलो र भारतमा वार्षिक साढे १४ केजी तेल खपत भईरहेको संयुक्त राष्ट्रसंघको तथ्याङ्कले देखाएको छ ।

नेपालमा वार्षिक सरदर प्रतिव्यक्ति १० केजीको दरमा तेल उपभोग हुँदै आएको छ । यता खुद्रा व्यपारीहरु भने होलसेल मै तेलको भाउ बढेर आएकोले त्यहि अनुसार आफूहरुले मूल्य लिने गरेको बताउंछन् ।

तर यता तेल उद्योगहरु भने सरकारले आगामी आर्थिक वर्ष २०७५÷०७६ को बजेटमा खाद्य वस्तुको आयातमा लाग्ने करको दायरा बढाएपछि बजारमा तेलको मूल्य वृद्धि भएको बताउंछन् । अहिले बजारमा गत बर्षको भन्दा खाद्य वस्तु लगायत अन्य सामानको मुल्य अस्वाभिक रुपमा बढेको छ ।

केहि महिना अघि सन फ्लावर तेलको मुल्य लिटरको १२० रुपैया थियो तर जेष्ठ १५ पछि अहिले सन फ्लावर तेलको मुल्य १४० रुपैया पर्छ । त्यस्तै तोरीको तेलको मूल्य छ । भटमासको तेलको बजार मूल्य पनि उस्तै छ ।

नेपाली बजारमा तोरी र भटमासको भन्दा सनफ्लावरको तेल बढी खपत हुने गरेको छ । मुल्य वृद्धि नियन्त्रणका लागि भन्दै बेला बेलामा सरकारी तवरबाट अनुगमन पनि हुने गरेको छ तर त्यो केवल देखाउन कै लागि गरिएको अनुगमन जस्तै भएको छ ।

बजार भाउ बढ्दो छ तर सरकार मंहगीका विरुद्ध खरो रुपमा प्रश्तुत हुनै सकेको छैन । मंहगी नियन्त्रणमा ल्याउन जरुरी छ ।