घरभित्र बसेका दम्पत्तीको जलेको कंकाल भेटियो

सप्तरी । सप्तरीमा एक बृद्धा दम्पत्तीको हत्यागरी घरभित्रै जलाइएको छ । सप्तरीको खड्ग नगरपालिका ५ खरचुहिया बजारमा एक दम्पतीको हत्याराले घरभित्रै जलाएको छ ।

पक्षघात भई घरभित्रै बसिरहेका ७५ वर्षीय सबुरी साह र उनकी श्रीमती ६५ वर्षीया बेचनीदेवी साहको हत्यापछि कोठाभित्रै आगो लगाइएको हो । दम्पतीका दुई छोरा सरकारी कार्यालयमा इन्जिनियर छन् ।

पूर्वपश्चिम राजमार्गसँगै जोडिएको खरचुहिया बजारको दुईतले पक्की घरमा सोमबार राति हत्या गरी जलाइएको सप्तरी प्रहरीले जनाएको छ ।

मंगलबार बिहान मात्रै घर जलेको देखेपछि थाहा भएको थियो । बिहान दूध लिएर आउँदै गर्ने व्यक्तिले घर नखुलेको भुइँतलाको झ्यालबाट धूवाँ निस्केको देखेपछि प्रहरीलाई खबर गरिएको थियो ।

स्थानीय बासिन्दाका अनुसार सम्पन्न परिवार साह दम्पतीले स्थानीयलाई लाखौं रुपैयाँ ब्याजमा लगाएका थिए । हत्या गर्ने समूहले दराजभित्र रहेका कर्जासम्बन्धी विभिन्न कागजातसमेत जलाएको छ ।

प्रहरी पुग्दा दम्पतीको शव कोठाभित्रै पूर्ण रूपमा जलेर नष्ट भैसकेको थियो । घरको भुइँतलाको कोठामा पूर्ण रूपमा जलेको अवस्थामा दम्पतीको शरीरका केही कंकाल मात्र घेतिएको प्रहरीको भनाइ छ । घटनास्थलको प्रकृति हेर्दा लुटपाट गर्ने उद्देश्यले हत्या गरेर जलाएको हुन सक्ने प्रहरीले बताएको छ ।

घरभित्र, बाहिर रगतका छिटा देखिएका छन् । घरभित्रको फ्रिज, दराज, आँगन, पर्खाल जताततै रगतका छिटा देखिएका छन् ।