चीन र भारतसँग भएका सम्झौताहरु तीब्र गतिमा कार्यान्वयनतर्फ : परराष्ट्रमन्त्री ज्ञवाली

काठमाडौं, २ साउन । परराष्ट्रमन्त्री प्रदीप ज्ञवालीले भारत र चीनसँग भएका सम्झौताहरु तीब्र गतिमा कार्यान्वयनतर्फ गएको बताएका छन् । प्रधानमन्त्री केपी शर्मा ओलीको दुई छिमेकी देशको भ्रमणका सिलसिलामा भएका सम्झौताहरु कार्यान्वयनमा गइरहेको र सरकारले छोटो अवधिमै महत्वपूर्ण कुटनीतिक सफलता प्राप्त गरेको पनि बताएका छन् ।

मन्त्री ज्ञवालीले भनेका छन्, “नेपाल र भारतबीच प्रतिबद्धता र कार्यान्वयनमा जुन खाडल थियो, त्यो अब हटेको छ ।” परराष्ट्रमन्त्री ज्ञवालीले थपे “इपिजीको प्रतिवेदनले २१औं शताब्दी सुहाउँदो सम्बन्धका लागि नीतिगत निर्देशन गर्नेछ भन्नेमा विश्वस्त छौं ।” उनले दुई देशका सचिवस्तरीय बैठक र परराष्ट्रमन्त्रीस्तरीय वार्ताको तयारी समेत थालिएको मन्त्री ज्ञवाली बताउँछन् ।

मन्त्री ज्ञवालीले कृषि क्षेत्रको सम्झौता कार्यान्वयनका लागि समझदारीपत्रमा हस्ताक्षरको तयारी भइरहेको बताए । अर्गानिक फार्म, माटोको परीक्षण, रासायनिक मलको सहज आयात तथा कृषि क्षेत्रको अनुसन्धान गरी ४ वटा क्षेत्रमा “एमओयू” गर्ने तयारी भइरहेको उनले जानकारी दिए । रक्सौल–काठमाडौं रेल्वेको “एमओयू”को तयारी भइरहेको पनि मन्त्री ज्ञवालीले जानकारी दिए । जलमार्ग सम्बन्धमा दुई देशबीचको वार्ता सोमबार सकिएको र नारायणी नदीमा ३ सय मेट्रिक टन क्षमताको पानीजहाज चल्ने उनले जानकारी दिए ।

भारतले नेपाललाई दिने थप ५ हवाई रुटको सम्झौता पनि कार्यान्वयनको चरणमै भएको उनको भनाई छ । आगामी अगस्टमा दुई देशबीच नयाँ वाणिज्य सन्धि हुन लागेको पनि उनले बताए । नेपाल र भारतबीच विश्वास र सहयोगको नयाँ अध्याय सुरु भइसकेको उनको दावी छ ।

चीनसँग पनि यही महिना प्रोटोकलमा हस्ताक्षर हुने मन्त्री ज्ञवालीले बताए । चीनसँग जुलाई महिनाभित्रै यातायात पारवहन प्रोटोकलमा हस्ताक्षर हुने भएको छ । १० र ११ जुलाईमा चीनमा भएको द्विपक्षीय वार्तापछि थप केही प्राविधिक विषय टुंगिन बाँकी रहेकाले जुलाईमै काठमाडौंमा अर्को वार्ता हुने भएको छ । सोही वार्तामा प्रोटोकलमा हस्ताक्षर हुने मन्त्री ज्ञवालीको भनाइ छ । प्रधानमन्त्री ओलीको चीन भ्रमणका क्रममा यो विषयमा समझदारी भएको थियो ।

यसैगरी सरकारले बिमस्टेक (बहुपक्षीय आर्थिक तथा प्राविधिक सहयोगका लागि बंगालका खाडीको प्रयास) सम्मेलनको तयारी तीव्र बनाइएको पनि ज्ञवालीले जानकारी दिए । आगामी भदौ १४ र १५ मा हुने चौथो सम्मेलनका लागि विभिन्न तयारी समिति गठन गरिएका छन् । परराष्ट्र मन्त्री ज्ञवालीले नेपालमा संविधान जारी भइसकेपछि यो निकै महत्वपूर्ण बहुपक्षीय भेटघाट हुने र नेपालका लागि यो महत्वपूर्ण रहेको बताएका छन् ।

“बिमस्टेक आसियान र सार्कबीचको पुल बन्छ जस्तो छ । अन्तरदेशीय सञ्जाल विस्तारको दृष्टिकोणले यो हाम्रो लागि निकै महत्वपूर्ण छ” मन्त्री ज्ञवालीको भनाई छ । नेपाल हाल बिमस्टेकको अध्यक्ष राष्ट्र हो । बिमस्टेकमा नेपाल, भारत, बंगलादेश, भुटान, श्रीलंका, म्यानमार र थाइल्यान्ड सदस्य छन् । सम्मेलनमा भारतीय प्रधानमन्त्री नरेन्द्र मोदीसहित सबै सदस्य राष्ट्रका सरकार प्रमुखहरु नेपाल आउने छन् ।