जाजरकोट ठाँटीबजारको पहिरोमा पुरिएका ९ जनाको शव निकालियो

काठमाडौं, २० साउन । जाजरकोटको भेरी नगरपालिका– ३ ठाँटीबजारमा गएको पहिरोमा परी पुरिएकामध्ये ९ जनाको शव निकालिएको छ ।

शव निकालिएकाहरुमा १३ वर्षीय नरेन्द्र परियार, ११ वर्षीय नवीन परियार, ८ वर्षीय गोविन्द परियार, ८ वर्षीय दर्शक परियार रहेका छन् । यस्तै नेपाल पत्रकार महासंघ जाजरकोटका सदस्य तीर्थबहादुर बोहराकी ८ वर्षीया छोरी नज्मा बोहराको पनि पहिरोमा पुरिएर मृत्यु भएको छ । यस्तै मृत्यु हुनेमा २५ वर्षीया तिर्सना सितला लुहार, उनकी छोरी ९ वर्षीया भगवती बिक, ६ वर्षीया रञ्जना बिक र ३ वर्षीया मनिषा बिक रहेका छन् । पहिरोमा परी शितलाका श्रीमान ३१ वर्षीय लालबहादुर लुहारको घाइते अवस्थामा उद्धार गरिएको छ । उनको जाजरकोट अस्पतालमा उपचार भइरहेको छ ।

पहिरो आज विहान सात बजेतिर गएको प्रहरीले जनाएको छ । पहिरोमा परी दुई घर पुरिएका छन् । स्थानीय ओमजङ शाहको घरमुनिबाट गएको पहिरोले पानीनाउला जाने बाटोको छेउँमा रहेको पत्रकार बोहरा र गोपाल सुनारको घर पुरिएको हो । पहिरोले घरभित्र भएका र बाटोमा हिडिरहेका बटुवाहरु पनि पुरिएका छन् ।

पहिरोमा पुरिएकाहरुको नेपाली सेना, नेपाल प्रहरी, सशस्त्र प्रहरी र स्थानीयले उद्धार गरिरहेका छन् । बर्षा नरोकिएको र अप्ठ्यारो भूभाग भएका कारण उद्धारमा समस्या परेको प्रहरीले जनाएको छ ।